پنجاب حکومت نے ہنگامی حالت نافذ کرنے کا اعلان کر دیا

رات کی تاریکی میں بھارت کی جانب سے پاکستان پر بزدلانہ حملہ ،وزیراعلیٰ پنجاب مریم نواز کی ہدایت پر صوبائی محکمہ داخلہ میں سکیورٹی بارے ہنگامی اجلاس منعقد ہوا۔

اجلاس کی صدارت سیکرٹری داخلہ پنجاب نور الامین مینگل نے کی جس میں حکومت پاکستان کی طرف سے جاری کردہ وار بک کے تناظر میں اہم فیصلے کئے گئے۔ ترجمان محکمہ داخلہ کے مطابق صوبہ بھر میں اہم تنصیبات کی سیفٹی کیلئے کے لئےسکیورٹی اداروں کو متحرک کر دیا گیا اور پنجاب بھر کے ہسپتالوں میں ہنگامی حالت نافذ کر دی گئی ہے۔

یہ بھی پڑھیں:پاک بھارت کشیدگی کے باعث وفاقی دارالحکومت کے تعلیمی ادارے کل بند رہیں گے

تمام سکیورٹی اداروں اور طبی عملے کو ہدایت کی گئی ہےکہ وہ ڈیوٹی پر رپورٹ کریں ۔ محکمہ داخلہ نے شہری دفاع  کے لیے سول ڈیفنس کے تمام وسائل کو فیلڈ میں متحرک کر دیا ہے۔ محکمہ داخلہ پنجاب میں انٹرنل سکیورٹی کا مرکزی کنٹرول روم قائم کر دیا گیا ہے جبکہ پنجاب بھر کے ڈپٹی کمشنرز کو اپنے کنٹرول رومز محکمہ داخلہ کے مرکزی کنٹرول روم سے منسلک کرنے کی ہدایت کی گئی ہے۔

یہ بھی پڑھیں: وفاقی دارالحکومت کے ہسپتالوں میں بھی ہائی الرٹ جاری کر دیا گیا ہے

صوبے بھر میں ہنگامی صور ت حال کے اعلان کیلئے سائرن اور وارننگ سسٹم ایکٹیویٹ کیے گئے ہیں جبکہ شہری دفاع کیلئے شیلٹرز کے تعین اور انہیں فنکشنل کرنے کی ہدایت کی گئی ہے۔ محکمہ داخلہ پنجاب نے ہدایت کی ہے کہ ہنگامی صورتحال میں ہسپتالوں اور مواصلاتی لائنوں کو مکمل طور پر فعال رکھا جائے۔ ہنگامی صورتحال کے پیشِ نظر پنجاب بھر میں تمام تعلیمی ادارے آج 7 مئی کو بند رہیں گے جبکہ آج کیلئے شیڈول تمام امتحانات ملتوی کر دیئے گئے ہیں۔