محکمہ موسمیات نے اگلے 3 سے 4 دن کے دوران رواں سال کی پہلی گرمی کی لہر کی پیشگوئی کردی ۔
محکمہ موسمیات کے مطابق15 سے 19 مئی کے دوران ملک کے بیشتر علاقوں میں موسم شدید گرم رہے گا ،20 مئی کو اسلام آباد سمیت بالائی علاقوں میں بارش اور ژالہ باری متوقع ہے ، 15 مئی سے ہوا کا زیادہ دباؤ ملک کے بیشتر علاقوں پر اثر انداز ہو گا۔
محکمہ موسمیات کابتانا ہے کہ 15 سے 20 مئی کے دوران ملک کے جنوبی علاقوں میں درجہ حرارت مزید بڑھے گا، سندھ، جنوبی پنجاب اور بلوچستان میں درجہ حرارت 4 سے 6 ڈگری سینٹی گریڈ زیادہ رہنے کا امکان ہے ، 15 سے 19 مئی کے دوران ملک کے بالائی علاقوں میں بھی درجہ حرارت بڑھے گا ۔
محکمہ موسمیات کے مطابق اسلام آباد بالائی خیبر پختونخوا کشمیر اور گلگت بلتستان میں درجہ حرارت 5 سے 7 ڈگری سینٹی گریڈ بڑھنے کا امکان ہے جبکہ 19 مئی سے مغربی ہواؤں کا سلسلہ ملک کے بالائی علاقوں میں داخل ہو گا ،شدید گرمی کی لہر کے دوران شہریوں کو محتاط رہنے کی ہدایت کی گئی ہے ۔
دوسری جانب پی ڈی ایم اے پنجاب نے بھی درجہ حرارت میں اضافے اور ہیٹ ویو بارے الرٹ جاری کردیا۔
ڈائریکٹر جنرل پی ڈی ایم اے نے صوبہ بھر کے کمشنرز و ڈپٹی کمشنرز کو الرٹ رہنے کی ہدایات کردی،ضلعی انتظامیہ سمیت تمام متعلقہ محکمے متوقع ہیٹ ویو اور موسمی صورتحال کے پیش نظر الرٹ رہیں۔
پی ڈی ایم اے پنجاب نے محکمہ سکول ایجوکیشن، ہیلتھ، ٹرانسپورٹ، لوکل گورنمنٹ، ریسکیو 1122 اور دیگر متعلقہ محکموں کو الرٹ جاری کر دیا ۔
ڈی جی پی ڈی ایم اے کاکہنا ہے کہ 15 مئی سے 19 مئی تک پنجاب کے بڑے شہروں اور میدانی علاقوں میں درجہ حرارت بڑھنے اور ہیٹ ویو کے خدشات ہیں ، وزیر اعلیٰ پنجاب کی ہدایت کے مطابق ضلعی انتظامیہ کو الرٹ جاری کر دیا ہے، انتظامیہ عوامی مقامات پر صاف پانی کی فراہمی کو یقینی بنائے۔
ڈی جی پی ڈی ایم اے نے ہدایات دی کہ ہسپتالوں اور موبائل ہیلتھ یونٹس میں ہیٹ سٹروک سے متعلق ابتدائی طبی امداد کی فراہمی یقینی بنائی جائے ، گرمی اور لو کی شدت میں اضافے سے عوام الناس کو بھی محتاط رہنا ہو گا۔
ڈی جی پی ڈی ایم اے نے کہا کہ دوپہر کے وقت کام کرنے والے لو سے بچنے کا اہتمام کریں، ہلکے رنگ کے کپڑے پہنیں سر ڈھانپ کر رکھیں ، بچوں بزرگوں کا خاص خیال رکھیں غیر ضروری سفر سے گریز کریں ، پرنٹ سوشل و الیکٹرانک میڈیا کے ذریعے شہریوں کو ہیٹ ویو بارے آگاہی دی جا رہی ہے ، ایمرجنسی میں پی ڈی ایم اے ہیلپ لائن 1129 یا ریسکیو 1122سے رابطہ کریں۔
By 
