سی ایس ایس امتحان کے خواہشمندوں کیلئے بڑی خبر

ویب ڈیسک۔ مقابلے کے امتحانات (سی ایس ایس) کی تیاری کرنے والے امیدواروں کے لیے اہم پیشرفت سامنے آئی ہے۔ قومی اسمبلی نے سی ایس ایس امتحان کے لیے عمر کی حد میں 5 سال اضافے اور امتحان دینے کی اجازت کی حد کو 5 مرتبہ تک بڑھانے کی قرارداد بھاری اکثریت سے منظور کر لی ہے۔

قومی اسمبلی کا اجلاس اسپیکر کی زیرِ صدارت منعقد ہوا، جس میں مسلم لیگ (ن) کی رکنِ اسمبلی سیدہ نوشین افتخار نے نوجوانوں کی دیرینہ خواہش پر مبنی یہ قرارداد پیش کی۔

قرارداد میں وفاقی حکومت سے مطالبہ کیا گیا کہ سی ایس ایس امتحان میں شرکت کے لیے عمر کی حد 30 سال سے بڑھا کر 35 سال کی جائے، اور امتحان دینے کی زیادہ سے زیادہ حد 3 سے بڑھا کر 5 مرتبہ مقرر کی جائے۔

ایوان نے قرارداد کو متفقہ طور پر منظور کرتے ہوئے حکومت کو سفارش کی کہ اس فیصلے پر فوری عملدرآمد کیا جائے تاکہ زیادہ سے زیادہ اہل اور قابل نوجوان انتظامی شعبے میں اپنی خدمات انجام دے سکیں۔

یہ بھی پڑھیں: احسن اقبال نے سی ایس ایس امتحان میں طلبا کی کامیابی کے لیے اہم تجویز پیش کر دی

رکن اسمبلی سیدہ نوشین افتخار کا کہنا تھا کہ عمر کی حد میں اضافے سے ہزاروں نوجوانوں کو فائدہ پہنچے گا، خصوصاً وہ افراد جو اعلیٰ تعلیم مکمل کرنے کے بعد عمر کی مقررہ حد کے باعث امتحان میں شرکت نہیں کر پاتے۔

دوسری جانب نوجوانوں نے اس فیصلے کو خوش آئند قرار دیتے ہوئے کہا ہے کہ اس سے انتظامی نظام میں میرٹ پر مبنی تقرریوں میں اضافہ ہوگا۔ اب توقع ہے کہ حکومت اس قرارداد کو عملی جامہ پہنانے کے لیے جلد اقدامات کرے گی۔

یہ بھی پڑھیں: سی ایس ایس کا برسوں پرانا امتحانی نظام تبدیل کرنے کے لئے حکومت تیار