بنیان مرصوص کے جذبے کو معاشی ترقی اور اقتصادی اہداف تک بڑھانے کی ضرورت ہے: رضوان سعید شیخ

یومِ تشکر کے موقع پر پاکستانی سفارتخانہ واشنگٹن ڈی سی میں پرچم کشائی کی پروقار تقریب انعقاد کیا گیا اور پرچم کشائی کی تقریب سے امریکہ میں پاکستانی سفیر رضوان سعید شیخ کا خطاب کیا۔

پاکستانی سفیر رضوان سعید شیخ نے کہا کہ یومِ تشکر کے موقع پر جہاں ہم خداوند کریم کے سامنے سربسجود ہیں وہاں ہم اپنی مسلح افواج کے شکر گزار ہیں جو ہماری آزادی کے ضامن ہیں، ہم ان معصومین، خواتین اور بچوں ، کا شکر ادا کرتے ہیں جنہوں نے ہماری سالمیت کی بقا کے لیے اپنی جانوں کا نذرانہ پیش کیا۔

سفیرِ پاکستان رضوان سعید شیخ نے کہا کہ بھارت کی جانب سے جارحیت نے ہماری قومیت کو از سرِ نو زندہ کیا ہے۔ رضوان سعید خان نے کہا کہ ہم نے کامل ایمان ، یقین اور ثابت قدمی کے ساتھ جارحیت کا مقابلہ کیا۔ رضوان سعید شیخ کا کہنا تھا کہ دنیا بھر نے دیکھا کہ پاکستانی قوم نے من الحیث القوم اپنے عہد آزادی کی تجدید کی۔

سفیر ِ پاکستان رضوان سعید شیخ نے کہا کہ ہم نے ثابت کیا کہ پاکستانی قوم اپنے وطن کی نظریاتی ، جغرافیائی سرحدوں کی حفاظت کے لئے خون کا آخری قطر ہ تک بہانے کے لئے تیار ہے ۔ سفیر پاکستان رضوان سعید شیخ نے کہا کہ یوم تشکر ایمان، اتحاد اور تنظیم کے سنہری اصولوں پر عمل پیرا ہونے کے لئے تجدید عہد کا موقع ہے۔

رضوان سعید شیخ کا کہنا تھا کہ آئیں آج اس امر کا اعادہ کریں کہ ہم ا پنے شخصی ، نظریاتی، سیاسی اور دیگر اختلافات سے بالاتر ہو کرنہ صرف اپنی آزادی کی حفاظت کریں گے۔ سفیر پاکستان نے کہا کہ قائد اعظم نے فرمایا تھا کہ پاکستان دنیا کا محور ہوگا۔ اس منزل کے حصول کے لئے بنیان مرصوص کے جذبے کو معاشی ترقی اور اقتصادی اہداف تک بڑھانے کی ضرورت ہے۔