پاکستان کی بیشتر سیاسی جماعتوں کی ویب سائٹس غیر فعال: فافن رپورٹ

اسلام آباد: فری اینڈ فیئر الیکشن نیٹ ورک (فافن) نے اپنی حالیہ رپورٹ میں  انکشاف کیا ہے کہ پاکستان کی صرف 35 فیصد سیاسی جماعتوں کی ویب سائٹس فعال ہیں، جب کہ زیادہ تر جماعتیں اپنی ویب سائٹس پر آئینی تقاضوں کے مطابق معلومات فراہم کرنے میں ناکام ہیں۔

رپورٹ کے مطابق ملک میں موجود 166 سیاسی جماعتوں میں سے صرف 58 کی ویب سائٹس فعال یا جزوی طور پر فعال ہیں۔ پارلیمنٹ میں نمائندگی رکھنے والی 20 جماعتوں میں سے 14 کی ویب سائٹس ہی فعال پائی گئیں۔

فافن  کی رپورٹ کے مطابق صرف 40 سیاسی جماعتوں نے اپنی ویب سائٹس پر مرکزی عہدیداروں کی فہرست دی، جب کہ صرف 6 جماعتوں نے ایگزیکٹو کمیٹی کے ارکان کی تفصیلات فراہم کیں۔ حیران کن طور پر صرف ایک جماعت نے مالی گوشوارے شائع کیے اور کسی بھی جماعت نے امیدواروں کے انتخاب کا طریقہ ویب سائٹ پر ظاہر نہیں کیا۔

یہ بھی پڑھیں: مودی نے اپنے ہی وزراء اور سیاست دانوں کی زندگیوں کو خطرات میں ڈال دیا

رپورٹ میں نشاندہی کی گئی ہے کہ مالی شفافیت وہ شعبہ ہے جس میں سب سے کم معلومات فراہم کی جاتی ہیں، اور یہ بھی واضح کیا گیا ہے کہ سوشل میڈیا کسی طور پر سیاسی جماعتوں کی باقاعدہ ویب سائٹس کا متبادل نہیں ہو سکتا۔

فافن نے جماعت اسلامی کی ویب سائٹ کو سب سے زیادہ معلوماتی قرار دیا، جب کہ پاکستان تحریکِ انصاف (پی ٹی آئی) کی ویب سائٹ صرف وی پی این کے ذریعے قابلِ رسائی ہے، جس سے عام صارفین کی رسائی محدود ہو جاتی ہے۔

فافن نے سیاسی جماعتوں پر زور دیا ہے کہ وہ اپنی ویب سائٹس کو فعال اور شفاف بنائیں تاکہ عوام کو معلومات تک بروقت رسائی حاصل ہو اور جمہوری عمل مضبوط ہو سکے۔