فلپائن میں 7.8 شدت کا زلز لہ، سونامی کی وارننگ جاری

فلپائن کے جنوبی جزیرے منڈاناؤ کے قریب سمندر میں 7.8 شدت کا طاقتور زلزلہ ریکارڈ کیا گیا جس کے بعد فلپائن سمیت خطے کے متعدد ممالک کے لیے سونامی وارننگ جاری کر دی گئی۔

زلزلے کے باعث ساحلی علاقوں میں خوف و ہراس پھیل گیا جبکہ حکام نے فوری حفاظتی اقدامات شروع کر دیے۔رپورٹس کے مطابق زلزلہ مقامی وقت کے مطابق صبح تقریباً 7 بج کر 40 منٹ پر آیا۔ زلزلے کا مرکز منڈاناؤ کے قریب سمندر میں تھا، جس کے جھٹکے دور دراز علاقوں تک محسوس کیے گئے۔ زلزلے کے بعد سونامی وارننگ سینٹر نے خبردار کیا کہ فلپائن کے بعض ساحلی علاقوں میں سمندر کی لہریں تین میٹر تک بلند ہو سکتی ہیں۔

 یہ بھی پڑھیں :جاپان میں 6.2 کا شدید زلزلہ ، علاقہ لرز اٹھا ، خوف وہراس

حکام نے خطرے کے پیش نظر ساحلی آبادیوں کے لیے ہنگامی الرٹ جاری کرتے ہوئے شہریوں کو فوری طور پر محفوظ اور بلند مقامات پر منتقل ہونے کی ہدایت کی ہے۔ ماہی گیروں اور سمندر میں موجود کشتیوں کو بھی احتیاطی تدابیر اختیار کرنے اور ساحل پر واپس آنے کا مشورہ دیا گیا ہے۔

دوسری جانب انڈونیشیا کے شمال مشرقی ساحلی علاقوں کے لیے بھی سونامی وارننگ جاری کی گئی ہے۔ ماہرین کے مطابق انڈونیشیا اور ملائیشیا کے بعض علاقوں میں ایک میٹر تک بلند لہروں کا امکان موجود ہے، جس کے باعث مقامی حکام صورتحال پر مسلسل نظر رکھے ہوئے ہیں۔

تاحال زلزلے یا ممکنہ سونامی کے نتیجے میں کسی جانی نقصان یا بڑے مالی خسارے کی اطلاع موصول نہیں ہوئی، تاہم امدادی اور ہنگامی اداروں کو الرٹ کر دیا گیا ہے۔ حکام کا کہنا ہے کہ آنے والے چند گھنٹے انتہائی اہم ہیں اور شہری صرف سرکاری ہدایات پر عمل کریں۔