عید الاضحی پر خریداری کے لیے اسٹیٹ بینک کا ‘گو کیش لیس’ سہولت کا آغاز

اسٹیٹ بینک آف پاکستان (ایس بی پی) نے عید الاضحی کے موقع پر ملک بھر میں “گو کیش لیس” سہولت مہم کا باضابطہ آغاز کردیا ہے۔ یہ مہم منگل 20 مئی 2025 کو شروع ہوئی اور عید الاضحی کی رات تک جاری رہے گی۔

اسٹیٹ بینک آف پاکستان کی طرف سے جاری بیان کے مطابق بینکنگ انڈسٹری کے تعاون سے اس اقدام کا مقصد قربانی کے مصروف سیزن کے دوران ملک بھر کی درجنوں مویشی منڈیوں میں ہموار، محفوظ اور زیادہ شفاف لین دین کی سہولت فراہم کرنا ہے۔

اب منڈی میں کیش نہیں صرف قربانی کا جانور سنبھالیں۔ ادائیگی راست سے کریں جو ہے فوری، فری، آسان اور محفوظ۔ SBP #Raast #RaastQR #DigitalPayments# pic.twitter.com/nXLyJ8BknH

— SBP (@StateBank_Pak) May 19, 2025

اس سال کی مہم کے دوران قربانی کے جانوروں کی خریداری، پانی اور چارے جیسی ضروری اشیا کی ادائیگی اور یہاں تک کہ بازاروں میں پارکنگ فیس سمیت مختلف لین دین کے لیے ڈیجیٹل ادائیگی کے حل دستیاب کرائے جائیں گے۔

ڈیجیٹل ادائیگی کے عمل کو مزید آسان بنانے کے لیے اسٹیٹ بینک نے ٹرانزیکشن کی حد عارضی طور پر 19 مئی سے بڑھا کر 15 جون 2025 کر دی ہے جس سے تاجروں اور خریداروں کو بغیر کسی تکلیف کے ڈیجیٹل طور پر بڑی ٹرانزیکشنز مکمل کرنے کی اجازت مل گئی ہے۔

پاکستان کے محکمہ موسمیات اور ماہرین فلکیات کے ماہرین نے 28 مئی کو ذی الحجہ کا چاند نظر آنے کی پیش گوئی کی ہے جس سے ظاہر ہوتا ہے کہ ملک بھر میں عید الاضحیٰ 7 جون کو منائے جانے کا امکان ہے۔