پاکستان ایسوسی ایشن دبئی (پی اے ڈی) نے متحدہ عرب امارات کا دنیا کا سب سے بڑا ہاتھوں کے نشانات سے بنا جھنڈا تیار کر کے گنیز ورلڈ ریکارڈ قائم کر دیا ہے۔
یہ منفرد جھنڈا 24,514 ہاتھوں کے نشانات پر مشتمل ہے، جن میں 100 سے زائد قومیتوں کے افراد نے حصہ لیا۔ یہ تاریخی کارنامہ “ہینڈز آف یونٹی” مہم کے تحت ایک ماہ کی محنت سے مکمل کیا گیا، جس میں 23 اسکولوں اور جامعات کے طلبہ و طالبات اور 39 مختلف مقامات پر موجود لوگوں نے شرکت کی۔
گنیز ورلڈ ریکارڈز کے نمائندے نے اس کامیابی کی تصدیق پاکستان آڈیٹوریم دبئی میں ہونے والی ایک خصوصی تقریب میں کی، جس میں پاکستان کے سفیر برائے یو اے ای فیصل نیاز ترمذی، قونصل جنرل حسین محمد اور 250 سے زائد معزز مہمانوں نے شرکت کی۔
یہ ریکارڈ پاکستان ایسوسی ایشن دبئی، ایمریٹس لوز پاکستان اور فنکارہ روباب زہرہ کے باہمی اشتراک سے قائم کیا گیا۔ پی اے ڈی، جو 1960 کی دہائی میں قائم ہوئی تھی، متحدہ عرب امارات میں مقیم پاکستانی کمیونٹی کی فلاح، ثقافت کے فروغ اور ترقی کے لیے سرگرم عمل ہے۔
یہ اقدام نہ صرف پاکستانی کمیونٹی کی یو اے ای سے گہری وابستگی کا عکاس ہے بلکہ مختلف قومیتوں کے درمیان اتحاد اور یگانگت کی بھی بہترین مثال ہے۔ “ہینڈز آف یونٹی” مہم نے ثابت کیا کہ مختلف پس منظر رکھنے والے افراد مل کر ایک بڑا مقصد حاصل کر سکتے ہیں۔
By 
