پی پی 52 ضمنی الیکشن کے غیر حتمی غیر سرکاری نتائج، ن لیگی امیدوار کو واضح برتری حاصل

کُل 185 میں سے 177 پولنگ اسٹیشنز کے غیر حتمی غیر سرکاری نتائج آگئے، پی ٹی آئی کے حمایت یافتہ امیدوار کے مقابلے میں ن لیگی امیدوار کو برتری حاصل ہے۔

تفصیلات کے مطابق پنجاب اسمبلی کی نشست پی پی 52 سالکوٹ کے ضمنی الیکشن کا انعقاد کیا گیا، جس میں ووٹنگ کے بعد اب گنتی اور غیر حتمی غیر سرکاری نتائج کا سلسلہ جاری ہے، جس میں مسلم لیگ (ن) کی امیدوار کو اب تک واضح برتری حاصل ہے۔

پنجاب کے شہر سیالکوٹ کے حلقہ پی پی 52 سمبڑیال کے ضمنی انتخاب کے لیے پولنگ کا عمل صبح 8 بجے سے شام 5 بجے تک بلا تعطل جاری رہا اور اس دوران کوئی ناخوشگوار واقعہ پیش نہیں آیا تاہم 10 منٹ کے لیے الیکشن کمشنر کی جانب سے ووٹنگ روکی گئی۔

پولنگ کا مقررہ وقت ختم ہونے کے بعد ووٹوں کی گنتی جاری ہے، غیر حتمی غیر سرکاری نتائج کا سلسلہ جاری ہے۔ غیر حتمی غیر سرکاری نتائج کے مطابق پی پی 52 سیالکوٹ کے 185 پولنگ اسٹیشنز میں سے 177 کے غیر حتمی اور غیر سرکاری نتائج آج نیوز کو موصول ہوگئے، غیر حتمی نتائج کے مطابق مسلم لیگ (ن) کو واضح برتری حاصل ہے۔

مزید پڑھیں: مولانا فضل الرحمٰن جس کرپشن کی بات کر رہے یہ اس وقت حکومت کا حصہ تھے : مشیر اطلاعات خیبرپختونخوا

غیر حتمی اور غیر سرکاری نتائج کے مطابق مسلم لیگ ن کی امیدوار حنا ارشد 74 ہزار 691 ووٹ لے کر پہلے نمبر پر ہیں۔ پاکستان تحریک انصاف کے حمایت یافتہ آزاد امیدوار فاخر نشاط 38 ہزار 631 ووٹ لے کر دوسرے نمبر پر ہیں۔

پی پی 52 ضمنی الیکشن: پی ٹی آئی کا احتجاج، آر او آفس کنٹینر لگا کر سیل پی پی 52 سیالکوٹ میں ہونے والے ضمنی انتخاب کے دوران پاکستان تحریک انصاف (پی ٹی آئی) کی جانب سے مبینہ دھاندلی کے خلاف شدید احتجاج کیا گیا۔

پی ٹی آئی کارکنوں نے آر او آفس کے باہر احتجاج کیا، جہاں الیکشن عملے کی جانب سے فارم 45 میں مبینہ رد و بدل کے الزامات لگائے گئے۔ انتظامیہ نے آر او آفس کو کنٹینرز لگا کر سیل کر دیا، جس پر پی ٹی آئی کارکن مشتعل ہو گئے۔ احتجاج کے دوران پولیس اور کارکنوں کے درمیان شدید دھکم پیل دیکھنے میں آئی۔

پولیس نے مظاہرین کو پیچھے دھکیلنے کی کوشش کی، جس پر کارکنوں نے مزاحمت کی۔ پولیس نے مظاہرہ منتشر کرنے کے لیے کارروائی کرتے ہوئے ایک کارکن کو حراست میں لے لیا جبکہ علاقے میں کشیدگی برقرار ہے جبکہ سکیورٹی مزید سخت کر دی گئی۔

مزید پڑھیں: پاکستان کے خلاف پانی کو ہتھیار نہ بناؤ، چینی تجزیہ کار وکٹر گاؤ کی بھارت کو کھلی وارننگ

پولنگ اسٹیشنز پر ووٹرز کی تعداد کم اتوار کی چھٹی کے باوجود شدید گرمی کے باعث ووٹرز نے حق رائے دہی کے لیے گھروں سے نکلنے سے گریز کیا اور اور پولنگ اسٹیشنز پر ووٹرز کی تعداد کم رہی۔ پولنگ کے دوران خفیہ ووٹ کی خلاف ورزی سامنے آئی جب ایک ووٹر نے بیلٹ پیپر پر مہر لگانے کے بعد تصویر سوشل میڈیا پر وائرل کردی حالانکہ بیلٹ پیپر کی تصویر لینا غیر قانونی عمل ہے۔

پی ٹی آئی اور پیپلزپارٹی کے ن لیگ پر دھاندلی کے الزامات پولنگ کے دوران پاکستان تحریک انصاف اور پیپلز پارٹی کی جانب سے مسلم لیگ (ن) پر الیکشن میں دھاندلی اور غنڈہ گردی کے الزامات عائد کرتے ہوئے کہا گیا کہ اُن کے پولنگ ایجنٹس اور ووٹرز کو تشدد کا نشانہ بنایا گیا جبکہ متعدد پولنگ اسٹیشنز سے باہر بھی نکال دیا گیا۔

راجہ پرویز اشرف نے کہا کہ ایسی شکایات بھی آئیں کہ ووٹرز کے پہنچتے ہی متعلقہ افسر نے پولنگ بند کر کے کمرے سے پولنگ ایجنٹس اور ووٹر کو باہر نکال دیا۔ پاکستان تحریک انصاف کے ترجمان شیخ وقاص اکرم نے بھی اسی طرح کے الزامات عائد کیے اور کہا کہ سیالکوٹ ضمنی انتخابات میں مینڈیٹ پر ڈاکہ مارا گیا تو عوام سڑکوں پرنکلیں گے، تحریک انصاف کے ورکروں اورکارکنوں پرتشدد کیا گیا، انہیں کوڈرایا دھمکایا گیا اس کے باوجود لوگ ہمارے ساتھ ہیں، مدت مکمل ہونے کے باوجود براجماں چیف الیکشن کمشنر کیا کررہے ہیں؟

مزید پڑ ھیں: فوج کے خلاف پروپیگنڈا کرنے والوں کو شرم آنی چاہیے : وفاقی وزیر برائے منصوبہ بندی و ترقی احسن اقبال

مریم اونگزیب نے الزامات کی تردید کردی مسلم لیگ (ن) کی رہنما اور سینئر صوبائی وزیر مریم اونگزیب نے الزامات کی تردید کرتے ہوئے کہا ہے کہ پی ٹی آئی نے وہی پرانا الزامات لگانے والا کھیل شروع کردیا جب کارکردگی نہیں ہوگی تو عوام ووٹ نہیں دیں گے۔

علاوہ ازیں الیکشن کمیشن نے دھاندلی کے الزامات کو مسترد کرتے ہوئے ثبوت فراہم کرنے کا مطالبہ کیا اور یقین دہانی کرائی ہے کہ شواہد لانے پر صوبائی الیکشن کمشنر کی جانب سے کارروائی کی جائے گی۔ الیکشن کمیشن نے پیپلز پارٹی کے دھاندلی کے الزامات بے بنیاد اور انتظامیہ کی جانب سے مختلف پولنگ اسٹیشنز کو بند کرنے کی خبر کو سراسر جھوٹ قرار دیا۔

خیال رہے کہ یہ نشست مسلم لیگ (ن) کے ایم پی اے ارشد جاوید وڑائچ کی وفات کے بعد خالی ہوئی تھی۔ ضمنی انتخاب میں پاکستان مسلم لیگ (ن) کی امیدوار حنا ارشد، پاکستان پیپلز پارٹی کی جانب سے راحیل کامران چیمہ اور پی ٹی آئی کے حمایت یافتہ امیدوار فخر نشاط کے درمیان مقابلہ ہے۔

ترجمان الیکشن کمیشن کا کہنا تھا کہ حلقہ پی پی 52 میں ووٹرز کی مجموعی تعداد 2 لاکھ 97 ہزار 185ہے، پولنگ کے عمل کو شفاف اور منظم بنانے کے لیے کل 1696 پولنگ اہلکاروں کی تعیناتی کی گئی تھی۔

الیکشن کمیشن کے مطابق حلقے میں کل 185 پولنگ سٹیشنز قائم کیے گئے جن میں سے 11 کو انتہائی حساس اور 38 کو حساس اور 136 کو نارمل قرار دیا گیا تھا جبکہ امن وامان کی صورتحال کو برقرار رکھنے کے لیے پولنگ اسٹیشنز پر 2 ہزار سے زائد پولیس اہلکار ڈیوٹی کے فرائض سرانجام دے رہے تھے۔