فرقہ وارانہ بیانیہ ملک کو خانہ جنگی کیطرف لے جا رہا ہے ، سابق بھارتی ہوم سیکرٹری

بھارت کے سابق ہوم سیکرٹری گوپال پلئی نے نریندر مودی کی پالیسیوں پر سخت تنقید کرتے کہا ہے کہ مودی حکومت ملک میں فرقہ وارانہ بیانیے کی پشت پناہی کر رہی ہے۔

سابق ہوم سیکرٹری گوپال پلئی نے کرن تھاپر کے پروگرام میں گفتگو کرتے ہوئے کہا کہ سرعام کہا جاتا ہے کہ “گولی مارو سالوں کو”، لیکن ایسے افراد کو حکومت کی حمایت اور ترقی دی جاتی ہے، جو نفرت انگیز باتیں کرتے ہیں۔ انہوں نے کہا کہ وزیراعظم مودی نے آئینی حلف کی روح کو پامال کیا ہے اور اقلیتوں کے خلاف امتیازی رویہ ریاستی سرپرستی میں جاری ہے۔

گوپال پلئی نے واضح کیا کہ جو ہندو بھارت کے موجودہ حالات پر خاموش ہیں، وہ ملک کو خطرے میں ڈال رہے ہیں۔ انہوں نے کہا کہ مذہبی تفریق اور داخلی انتشار بھارت کو خانہ جنگی کی طرف دھکیل رہے ہیں، اور ملک کا اتحاد مذہبی رواداری سے مشروط ہے۔

یہ بھی پڑھیں : میکسیکو کا امریکی ٹیرف پر جوابی اقدامات کا اعلان

انہوں نے کہا کہ کوئی بھی ملک جہاں فرقہ وارانہ فسادات ہوں، ترقی نہیں کر سکتا، اگر تبدیلی نہ لائی گئی تو موجودہ حکومت کو تاریخ ایک تاریک باب کے طور پر یاد رکھے گی۔

بھارت کے سابق ہوم سیکرٹری کے خیالات ثابت کرتے ہیں کہ بھارت کا سیکولر ملک ہونے کا دعویٰ جھوٹا ہے، یہ باتیں ایسے وقت میں سامنے آئی ہیں جب  بھارت میں  اقلیتوں کے تحفظ پر  سوالات اٹھائے جا رہے ہیں۔