اسلام آباد: قومی اسمبلی کے اسپیکر سردار ایاز صادق نے وفاقی بجٹ 2025-26 کے لیے قومی اسمبلی کے شیڈول کی منظوری دے دی ہے۔
وفاقی بجٹ 2025-26 کو 10 جون کے روز قومی اسمبلی میں پیش کیا جائے گا، جبکہ 11 اور 12 جون کو اسمبلی اجلاس منعقد نہیں ہوگا۔ اس کے بعد 13 جون سے بجٹ پر بحث کا آغاز ہوگا۔
اسپیکر کے مطابق پارلیمانی جماعتوں کو قواعد و ضوابط کے مطابق بجٹ پر اظہار خیال کے لیے وقت دیا جائے گا۔ بجٹ پر بحث 21 جون تک جاری رہے گی اور اسی روز اس کو سمیٹا جائے گا۔
مزید بتایا گیا ہے کہ 22 جون کو اجلاس نہیں ہوگا، جبکہ 23 جون کو مالی سال 2025-26 کے ضروری اخراجات پر بحث کی جائے گی۔ 24 اور 25 جون کو ڈیمانڈز، گرانٹس اور کٹوتی کی تحاریک پر بحث اور ووٹنگ ہوگی۔
ایاز صادق کے مطابق 26 جون کو فنانس بل قومی اسمبلی سے منظور کیا جائے گا، جبکہ 27 جون کو سپلیمنٹری گرانٹس اور دیگر امور پر بحث اور ووٹنگ ہوگی۔ شیڈول میں کسی بھی تبدیلی کے لیے اسپیکر کی اجازت ضروری ہوگی۔
By 
