بہت ساری ملاقاتیں اور فون کالز ہو رہی ہیں، ایران اور اسرائیل جلد معاہدہ کرلیں گے، ٹرمپ

ویب ڈیسک۔ امریکی صدر ڈونلڈ ٹرمپ نے کہا ہے کہ ایران اور اسرائیل کو معاہدہ کرنا چاہیے اور دونوں ممالک کے درمیان جلد امن قائم ہوگا۔

اپنے سوشل میڈیا پلیٹ فارم ٹروتھ سوشل پر جاری بیان میں ٹرمپ نے کہا کہ ایران اور اسرائیل کے درمیان بہت ساری ملاقاتیں اور فون کالز ہو رہی ہیں، اور دونوں ممالک معاہدہ کریں گے۔

انہوں نے مزید کہا کہ یہ معاہدہ ویسا ہی ہوگا جیسا میں نے بھارت اور پاکستان کے درمیان کرایا تھا۔ بھارت اور پاکستان کے معاہدے میں امریکا کے ساتھ تجارت کی دلیل استعمال کی گئی، دو بہترین رہنماؤں سے بات کی جو فوری فیصلہ کرنے کی صلاحیت رکھتے تھے، اور سب کچھ رُک گیا۔

یہ بھی پڑھیں: ایران کی دھمکیوں کے باوجود اسرائیل کے دفاع سے دستبردار نہیں ہوں گے: برطانوی وزیراعظم

ٹرمپ کا کہنا تھا کہ میں بہت کچھ کرتا ہوں مگر مجھے کبھی کسی چیز کا کریڈٹ نہیں ملتا، لیکن کوئی بات نہیں، عوام سب کچھ جانتی ہے۔

انہوں نے اپنی پہلی مدت صدارت کے دوران سربیا اور کوسووو، اور مصر اور ایتھوپیا کے درمیان کرائے گئے معاہدوں کا بھی ذکر کیا۔

اپنے بیان کے آخر میں ٹرمپ نے کہا: “مشرق وسطیٰ کو پھر سے عظیم بناؤ”۔

یہ بھی پڑھیں: فیکٹ چیک: پاکستان کی جانب سے اسرائیل کو جوہری حملے کی دھمکی کا دعویٰ جھوٹا قرار