نوبیل امن انعام کیلئے ٹرمپ کو نامزدکیا جائے ، امریکی رکن کانگریس نے بھی خط لکھ دیا

اسرائیل اور ایران کے درمیان جنگ بندی میں کلیدی کردار ادا کرنے پر امریکی صدر ڈونلڈ ٹرمپ کو نوبیل امن انعام کے لیے کانگریس رکن نے بھی باقاعدہ  خط لکھ دیا ۔

امریکی میڈیا کے مطابق جارجیا سے ریپبلکن رکن کانگریس بڈی کارٹر نے صدر ٹرمپ کی نامزدگی کے لیے نوبیل کمیٹی کو خط لکھا ہے، اپنے خط میں کارٹر نے ٹرمپ کے کردار کو غیر معمولی اور تاریخی قرار دیا۔

 صدر ٹرمپ کو اسرائیل، ایران جنگ بندی میں کردار ادا کرنے کے اعتراف میں نوبیل امن انعام کے لیے نامزد کیا گیا۔

یہ بھی پڑھیں :پاک بھارت جنگ بندی میں کردار،پاکستان نے ٹرمپ کو نوبیل امن انعام دینےکی سفارش کا خط بھیج دیا

 خط میں بڈی کارٹر نے لکھا کہ دنیا میں دہشت گردی کے سب سے بڑے ریاستی معاون کو مہلک ترین ہتھیاروں کے حصول سے روکنے اور اسرائیل اور ایران کے درمیان مسلح تنازع کے خاتمے میں ٹرمپ کے غیرمعمولی اور تاریخی کردار کے اعتراف میں نوبیل امن انعام کے لیے نامزد کیا جانا چاہیے۔

واضح رہے کہ اس سے قبل پاکستان نے بھی امریکی صدرٹرمپ کو نوبیل امن انعام دینے کی سفارش کا خط ناروے کی نوبیل کمیٹی کوبھیجا تھا۔

حکومت پاکستان کا کہنا تھا کہ امریکی صدر ٹرمپ کی مداخلت سے پاکستان بھارت جنگ ٹل گئی ، نوبیل امن انعام2026  کے لیے سفارش کا فیصلہ حالیہ پاک بھارت بحران میں صدر ٹرمپ کے فیصلہ کن سفارتی مداخلت پر کیا گیا۔

یہ بھی پڑھیں : ایران میں حکومت کی تبدیلی سےمتعلق صدر ٹرمپ کی وضاحت سامنے آ گئی

ٹرمپ نے کہا تھا کہ پاکستان بھارت کی جنگ بند کرانے پر مجھے نوبیل پرائز ملنا چاہیے مگر نوبیل پرائز صرف لبرلز کو ملتا ہے، یہ لوگ مجھے نہیں دیں گے۔

یاد رہے کہ گزشتہ ماہ پاکستان اور بھارت کے درمیان جنگ کے دوران 10 مئی کو ڈونلڈ ٹرمپ نے ہی اپنے سوشل میڈیا پلیٹ فارم ٹروتھ سوشل پر اعلان کیا تھا کہ پاکستان اور بھارت جنگ بندی پر متفق ہوگئے ، اوراب اسرائیل ایران جنگ بندی کا اعلان بھی صدر ٹرمپ نے کیا تھا۔