وزیراعظم سے امریکی وزیرخارجہ کا ٹیلیفونک رابطہ، مشرق وسطیٰ کی صورتحال پر گفتگو

وزیراعظم پاکستان شہباز شریف اور امریکی وزیر خارجہ مارکو روبیو کے درمیان ٹیلی فونک رابطہ ہوا ہے۔

وزیراعظم آفس کے مطابق ’امریکی وزیر خارجہ نے جمعرات کی شام شہباز شریف کو ٹیلی فون کیا اور مشرق وسطیٰ کی صورتِ حال پر تبادلہ خیال کیا ۔

گفتگو کے دوران وزیراعظم شہباز شریف نے امریکی صدر ڈونلڈ ٹرمپ کی فیصلہ کن قیادت کو سراہا جس کی وجہ سے ایران اور اسرائیل کے درمیان جنگ بندی ہوئی۔

 وزیراعظم شہباز شریف نے پاک- بھارت جنگ بندی میں امریکا کے کلیدی کردار پر سیکریٹری روبیو کا شکریہ بھی ادا کیا۔

ٹیلی فونک رابطے میں پاکستان اور امریکا کے تعلقات کو مضبوط بنانے اور خاص طور پر تجارت بڑھانےکے لیے مل کر کام جاری رکھنے پر اتفاق کیا گیا۔۔

مشرق وسطیٰ کی موجودہ صورتحال پر اظہار خیال کرتے ہوئے شہباز شریف کا کہنا تھا کہ پاکستان مشرق وسطیٰ میں قیام امن کے لیے تعمیری کردار ادا کرتا رہے گا۔

یہ بھی پڑھیں :امریکا کی جانب سے ایران کو اقتصادی پابندیاں ختم کرنے کی پیشکش کا امکان

دوسری جانب، مارکو روبیو کا کہنا تھا کہ امریکا خطے میں امن اور استحکام کے فروغ کے لیے پاکستان کے ساتھ مل کر کام کرنا چاہتا ہے۔

دریں اثنا واشنگٹن میں پریس بریفنگ کے دوران ترجمان امریکی محکمہ خارجہ ٹیمی بروس نے کہا ہے کہ امریکی وزیر خارجہ مارکو روبیو نے وزیراعظم شہباز شریف سے مشرق وسطیٰ کی صورتحال پر بات کی ہے۔

انہوں نے کہا کہ وزیر خارجہ مارکو روبیو نے زور دیا کہ ایران کبھی بھی نیوکلیئر ہتھیار نہ تو بنا سکتا ہے اور نہ انہیں حاصل کرسکتا ہے۔

ٹیمی بروس کے مطابق دونوں رہنماؤں نے اسرائیل اور ایران کے درمیان دائمی امن اور علاقائی استحکام کے لیے مل کر کام کرنے کی اہمیت تسلیم کی۔

پاکستان اور امریکہ کے درمیان حالیہ مہینوں میں سفارتی تعاون میں نمایاں پیش رفت دیکھنے میں آئی ہے، جس نے دوطرفہ تعلقات کو نئی سمت دی ہے ، کئی اعلیٰ سطح کی ملاقاتیں، مشترکہ منصوبے اور بین الاقوامی فورمز پر ہم آہنگی کے بیانات دونوں ممالک کی جانب سے سامنے آئے ہیں۔