برطانوی وزارتِ دفاع نے تین جدید ہوور کرافٹس پاکستان بحریہ کے حوالے کر دیے

لندن: برطانیہ کی وزارتِ دفاع نے تین جدید اور تیز رفتار ہوور کرافٹس پاکستان بحریہ کے سپرد کر دیے ہیں، جو پاکستان کی سمندری دفاعی صلاحیت کے حوالے سے ایک اہم پیشرفت ہے۔ یہ ہوور کرافٹس برطانیہ کی معروف کمپنی “گرفن میرین سپورٹ” نے تیار کیے ہیں، اور ان کی حوالگی 25 جون 2025 کو مکمل ہوئی۔ یہ پیشرفت فروری 2022 میں حکومت سے حکومت کے تحت طے پانے والے معاہدے کا نتیجہ ہے۔

یہ جدید ہوور کرافٹس اپنی تیز رفتاری، آسان نقل و حرکت اور مختلف نوعیت کے مشن سرانجام دینے کی صلاحیت کی وجہ سے مشہور ہیں۔ ان کی شمولیت سے پاکستان بحریہ کو ساحلی علاقوں میں فوری کارروائی اور امدادی مشن انجام دینے میں نمایاں بہتری حاصل ہوگی۔

ان ہوور کرافٹس کو نہ صرف دفاعی مقاصد کے لیے بلکہ قدرتی آفات اور انسانی ہمدردی کے مواقع پر بھی استعمال کیا جا سکے گا، جس سے بحریہ کی کارکردگی اور رسائی مزید مستحکم ہو جائے گی۔

یہ بھی پڑھیں: انڈین نیوی پاکستانی بحریہ کے طیارے کو نشانہ بنانے میں ناکام ، بھارتی بحریہ پاکستان کے ساحل سے سینکڑوں کلومیٹر دور رہا

پاکستان، برطانیہ کے ساتھ اپنے دیرینہ اور مضبوط دفاعی تعلقات کو انتہائی اہمیت دیتا ہے۔ ان جدید ہوور کرافٹس کی حوالگی دونوں ممالک کے درمیان گہرے اعتماد، دفاعی تعاون اور دوستی کی ایک اور روشن مثال ہے۔ دونوں ملک دفاعی شعبے میں مشترکہ مشقوں، تربیتی پروگراموں اور تکنیکی تعاون کو جاری رکھے ہوئے ہیں۔

اس موقع پر ایک خصوصی تقریب لندن میں منعقد ہوئی، جس میں پاکستان ہائی کمیشن لندن کے نیول اور دفاعی مشیر کموڈور جواد حیدر خواجہ (ستارہ امتیاز (ملٹری)، تمغہ بسالت)، وزارتِ دفاع برطانیہ کے نمائندہ کموڈور رچرڈ ویلی، دفاعی خریداری کے اتاشی کیپٹن (نیوی) محمد فیصل منظور (تمغہ امتیاز (ملٹری)) سمیت دونوں جانب کے اعلیٰ افسران نے شرکت کی۔

یہ بھی پڑھیں: تنگہ ہرمز بند نہیں ہوا، بحری آمد و رفت معمول کے مطابق جاری