بھارتی طیارے کی پرواز میں کھڑکی کا حصہ دورانِ پرواز ٹوٹ گیا، مسافر خوفزدہ، ویڈیوپر وائرل

ویب ڈیسک۔ بھارتی مسافروں طیاروں کی خستہ حالی اور حادثات کا سلسلہ جاری ہے۔ یکم جولائی کی دوپہر بھارتی ریاست گووا سے پونے جانے والی اسپائس جیٹ کی پرواز SG-1080 پر سب کچھ معمول کے مطابق چل رہا تھا، جب اچانک مسافروں کو ایک عجیب واقعے کا سامنا کرنا پڑا۔ طیارے کی ایک کھڑکی کا اندرونی فریم ہوا میں ہی اپنی جگہ سے الگ ہو گیا۔ یہ لمحہ کچھ مسافروں کے لیے کافی خوفناک تھا۔

بھارتی میڈیا کی رپورٹس کے مطابق ایک مسافر نے اس لمحے کی ویڈیو بنائی اور سوشل میڈیا پلیٹ فارم “ایکس” (سابقہ ٹوئٹر) پر شیئر کر دی۔ ویڈیو میں صاف دکھائی دے رہا تھا کہ کھڑکی کا اندرونی حصہ اپنی جگہ سے ہٹ چکا ہے۔ مسافر نے پوسٹ میں لکھا:
“آج گووا سے پونے آنے والی اسپائس جیٹ کی پرواز۔ پوری کھڑکی کا اندرونی حصہ دوران پرواز گر گیا۔ اور یہ پرواز اب جے پور جانے والی ہے۔ کیا یہ واقعی قابلِ پرواز ہے؟”

اس ویڈیو نے سوشل میڈیا پر ہلچل مچا دی اور لوگ طیارے کی حفاظت پر سوال اٹھانے لگے۔

#SpiceJet from Goa to Pune today. The whole interior window assembly just fell off mid flight. And this flight is now supposed to take off and head to Jaipur. Wonder if it’s air worthy @ShivAroor @VishnuNDTV @DGCAIndia pic.twitter.com/x5YV3Qj2vu

— Aatish Mishra (@whatesh) July 1, 2025

بھارتی طیارے اسپائس جیٹ نے واقعے پر وضاحت دیتے ہوئے کہا کہ کھڑکی کا صرف اندرونی فریم ہٹا تھا، جبکہ بیرونی شیشہ صحیح سلامت اپنی جگہ موجود رہا۔ بھارتی ایئرلائن نے یقین دہانی کرائی کہ طیارے میں کیبن پریشر کا کوئی مسئلہ نہیں ہوا، اس لیے مسافروں کی حفاظت کو کوئی خطرہ نہیں تھا۔

طیارہ جب پونے پہنچا تو تکنیکی ٹیم نے کھڑکی کا فریم دوبارہ لگا دیا۔ ایئرلائن کا کہنا تھا کہ مرمت کا کام معمول کے مطابق طریقۂ کار کے تحت کیا گیا۔

یہ بھی پڑھیں: بھارتی ریاست منی پور میں 2 سو سے زائد شہری قتل، مودی کی بے حسی،اور اخلاقی دیوالیہ پن کی داستان

اگرچہ اسپائس جیٹ نے کہا کہ حفاظتی اقدامات متاثر نہیں ہوئے، مگر اس واقعے کے بعد ایک بار پھر بھارت کی مقامی ایئرلائنز کی دیکھ بھال اور حفاظتی نظام پر سوالات اٹھنے لگے ہیں۔

بھارتی ایوی ایشن ماہرین اور باقاعدگی سے سفر کرنے والے لوگ پہلے ہی کیبن پینل کی خرابیوں، تکنیکی مسائل اور جھٹکوں کے باعث زخمی ہونے جیسے واقعات پر تشویش کا اظہار کر چکے ہیں۔ ان کا ماننا ہے کہ صرف پروٹوکول کی باتیں کافی نہیں، اصل میں ان پر عمل بھی ضروری ہے۔

عوام کو تسلیاں دی جاتی رہتی ہیں، لیکن بار بار ایسے واقعات پیش آنا لوگوں کا اعتماد متزلزل کر رہا ہے۔