سیکورٹی فورسز نے پاک افغان بارڈر پر درانداز ی کی کوشش ناکام بنادی،بھارتی حمایت یافتہ فتنہ الخوارج کے 30 دہشتگرد مارے گئے ۔
سیکورٹی فورسز نے افغانستان سے متصل سرحد پر ایک بڑی دہشتگردی کی کوشش کو ناکام بناتے ہوئے 30 دہشت گردوں کو ہلاک کر دیا۔ آئی ایس پی آر کے مطابق یہ کارروائیاں یکم اور 2 جولائی اور پھر 2 اور 3 جولائی کی درمیانی شب شمالی وزیرستان کے علاقے حسن خیل میں عمل میں لائی گئیں۔
بیان کے مطابق بھارتی حمایت یافتہ شدت پسند گروہ “فتنہ الخوارج” کی پاکستان میں داخل ہونے کی بڑی کوشش کو پاکستانی فورسز نے بروقت ردِعمل کے ذریعے ناکام بنایا۔ دشمن عناصر کو شدید جوابی کارروائی کا سامنا کرنا پڑا، جس کے نتیجے میں تمام دہشتگرد مارے گئے۔
کارروائی کے دوران دہشتگردوں کے قبضے سے بھاری مقدار میں اسلحہ، بارود اور دیگر جنگی سازوسامان بھی برآمد ہوا۔
آئی ایس پی آر کا کہنا ہے کہ سیکورٹی فورسز کی مستعدی اور بروقت ایکشن نے ملک کو ایک بڑی تباہی سے بچا لیا۔ اس سلسلے میں افغان حکام سے بھی مطالبہ کیا گیا ہے کہ وہ اپنی سرزمین کو دہشتگرد گروہوں یا غیر ملکی پراکسیز کے لیے استعمال ہونے سے روکیں اور ایسے عناصر کے خلاف مؤثر اقدامات کریں۔
پاک فوج نے اپنے بیان میں واضح کیا ہے کہ پاکستان کی سرحدوں کے تحفظ اور ملک دشمن عناصر، بالخصوص بھارتی سرپرستی میں سرگرم دہشتگردوں کے مکمل خاتمے کے لیے عزم و تیاری مکمل ہے۔
By 
