یوم عاشور پر مقبوضہ کشمیر میں پابندیاں لگانا بھارت کی اسلام دشمنی کا واضح ثبوت ہے،خواجہ آصف

وزیر دفاع خواجہ محمد آصف نے کہا کہ حضرت امام حسینؓ نے دین اسلام کی سربلندی کے لیے عظیم قربانی پیش کی، اور آج فلسطین کے علاقے غزہ میں بھی اسی طرح کی قربانیوں کا سلسلہ جاری ہے، لیکن افسوس کہ مسلم دنیا خاموش تماشائی بنی ہوئی ہے۔

انہوں نے کہا کہ کربلا ہمیں یہ پیغام دیتا ہے کہ دین کی خاطر رسول اللہؐ کے خاندان نے سب کچھ قربان کر دیا اور اس وقت کے حالات میں آلِ رسولؐ کو تنہا چھوڑ دیا گیا تھا۔ آج بھی اسی طرز پر، غزہ میں ہزاروں معصوم جانیں ناحق شہید ہو چکی ہیں، لیکن اسلامی دنیا کی طرف سے کوئی مؤثر ردعمل سامنے نہیں آیا۔

وزیر دفاع نے سیالکوٹ میں میڈیا سے گفتگو کرتے ہوئے مزید کہا کہ یوم عاشور پر مقبوضہ کشمیر میں پابندیاں لگانا بھارت کی اسلام دشمنی کا واضح ثبوت ہے،آج 70 ہزار سے زائد فلسطینی جن میں بچے اور بزرگ شامل ہیں، شہید ہو چکے ہیں لیکن 58 مسلم ممالک میں سے کسی میں بھی سنجیدہ سطح پر احتجاج نہیں ہوا۔

یہ خبر بھی پڑھیں :روایتی جنگ کے بعد آبی جنگ میں بھی بھارت کو ہی شکست ہوگی، خواجہ آصف

یہ وقت ہے کہ مسلمان حکمران خواب غفلت سے بیدار ہوں اور اپنی ذمہ داری کو سمجھیں،انہوں نے غزہ کے عوام کی قربانی کو بے مثال قرار دیا اور کہا کہ کربلا کے بعد ایسی عظیم قربانی کہیں اور نہیں دیکھی گئی، دنیا بھر میں لاکھوں غیر مسلم بھی فلسطینی عوام سے اظہار یکجہتی کے لیے سڑکوں پر نکلے، لیکن مسلم دنیا میں اس طرح کا کوئی منظر دکھائی نہیں دیا، حتیٰ کہ پاکستان میں بھی خاموشی غالب رہی۔

ان کا کہنا تھا کہ آج اسلام کی حفاظت کی باتیں وہ لوگ کر رہے ہیں جو خود مسلمان نہیں جبکہ ڈیڑھ ارب مسلمان خاموشی کی چادر اوڑھے بیٹھے ہیں، غزہ کے بچے اور بوڑھے خوراک کے لیے قطاروں میں کھڑے ہوتے ہیں اور ان پر گولیاں برسائی جاتی ہیں۔

آخر میں انہوں نے کہا کہ غزہ کے عوام روزِ محشر سوال کریں گے کہ ہم نے امام حسینؓ کی سنت پر عمل کرتے ہوئے قربانیاں دیںلیکن امت مسلمہ نے ہمارا ساتھ نہ دیا۔