بھارت آپریشن سندور کے مقاصد اور اہداف حاصل کرنے میں بری طرح ناکام رہا، فیلڈ مارشل سید عاصم منیر

فیلڈ مارشل سید عاصم منیر نے کہا ہے کہ پاکستان کی زبردست دفاعی صلاحیت کی بدولت بھارت پاکستان کے خلاف شروع کیے گئے ’آپریشن سندور‘ کے اہداف اور مقاصد حاصل کرنے میں بری طرح ناکام رہا ہے۔

یہ بھی پڑھیں:بھارت آپریشن سندور کے مقاصد اور اہداف حاصل کرنے میں بری طرح ناکام رہا، فیلڈ مارشل سید عاصم منیر

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے نیشنل ڈیفنس یونیورسٹی اسلام آباد کا دورہ کیا جہاں انہوں نے نیشنل سیکیورٹی اینڈ وار کورس کے گریجویٹ افسران سے خطاب کیا۔

اپنے خطاب میں فیلڈ مارشل نے جنگ کے ابھرتے ہوئے کردار پر روشنی ڈالی اور پیچیدہ اور بدلتی ہوئی صورت حال سے نمٹنے کے ذہنی تیاری، آپریشنل صلاحیت اور ادارہ جاتی پیشہ ورانہ مہارتوں کو اپنانے کی ضرورت پر زور دیا۔

انہوں نے سول ملٹری ہم آہنگی کو بڑھانے اور ہائبرڈ، روایتی اور غیر روایتی خطرات کو کم کرنے کی صلاحیت رکھنے والی مستقبل کی قیادت کو پروان چڑھانے میں این ڈی یو جیسے اہم اداروں کے کردار کو سراہا۔

اعلامیے کے مطابق فیلڈ مارشل عاصم منیر نے کہا کہ آپریشن سندور کے دوران بھارت کی جانب سے اپنے بیان کردہ فوجی مقاصد کے حصول میں ناکامی اور اس کے بعد پیچیدہ منطق کے ذریعے اس کمی کو معقول بنانے کی کوشش اس کی آپریشنل تیاری اور اسٹریٹجک دور اندیشی کے فقدان کو ظاہر کرتی ہے۔

مزید پڑھیں: ہر بے گناہ پاکستانی کے خون کا بدلہ ضرور لیا جائے گا، فیلڈ مارشل عاصم منیر کی قوم کو یقین دہانی

انہوں نے کہا کہ بھارت کے الزامات اور بے بنیاد بیانات بھارت کی آپریشن ’بنیان مرصوص‘ میں پاکستان کی کامیابی کو تسلیم کرنے میں روایتی ہچکچا ہٹ کی عکاسی کرتے ہیں اور پاکستان کی دہائیوں پر مبنی حکمتِ عملی، مقامی صلاحیت اور مضبوط اداروں کی بنیاد پر کامیابی کو تسلیم کرنے سے  گریزاں ہے۔

خطے کے تمام ممالک بھارت کے جارحانہ اور ہندوتوا نظریے سے تنگ ہیں

انہوں نے کہا کہ خالصتاً دوطرفہ فوجی تصادم میں دیگر ملکوں کو شامل کرنا، بھارت کی ناقص سیاسی کوشش ہے، بھارت کی طرف سے اس طرح کے بے بنیاد بیانات کا مقصد خطے میں فرضی ’نیٹ سیکیورٹی پروائڈر‘کے خود ساختہ رول کی ناکام کوشش ہے، وہ بھی ایسے وقت میں جب خطے کے ممالک بھارت کی جارحانہ اور ہندوتوا نظریے سے تنگ ہیں۔

بھارت کے خودغرضانہ اور تنگ نظر برتاؤ کے برعکس پاکستان  نے اقوام عالم میں اصولی سفارتکاری پر مبنی دیرپا شراکت داری، باہمی احترام  اور امن کی بنیاد پر تعلقات قائم کیے ہیں اور خود کو خطے میں نیٹ ریجنل اسٹیبلائزر ثابت کیا ہے ، فیلڈ مارشل

فیلڈ مارشل نے پاکستان کے اصولی موقف کو دہراتے ہوئے کہا کہ ’ کسی بھی مہم جوئی، پاکستان کی خودمختاری اور سالمیت کو نقصان پہنچانے کی کوشش یا  اس  کی خلاف ورزی کا بغیر کسی ہچکچکاہٹ کے فوری اور منہ توڑجواب دیا جائے گا‘۔

بھارتی جارحیت پر اب انتہائی شدید، گہرا اور تکلیف دہ جواب دیا جائے گا

آئی ایس پی آر کے مطابق فیلڈ مارشل نے کہا کہ ہماری آبادی کے مراکز، فوجی اڈوں، اقتصادی مراکز اور بندرگاہوں کو نشانہ بنانے کی کسی بھی کوشش کا شدید، گہرا، تکلیف دہ اور سوچ سے بڑھ کر زیادہ سخت جواب دیا جائے گا۔

فیلڈ مارشل سید عاصم منیر نے مزید کہا کہ آئندہ پیدا ہونے والی کشیدگی کی اصل ذمہ داری اس (بھارت) بصیرت سے محروم مغرور جارح پر عائد ہوگی، جو ایک خودمختار ایٹمی ریاست کے خلاف اشتعال انگیزی سے پیدا ہونے والے ممکنہ تباہ کن نتائج کا ادراک کرنے میں ناکام رہا۔

یہ بھی پڑھیں: پاکستان کا تذکرہ نیٹو اجلاس میں، ڈونلڈ ٹرمپ کی پھر فیلڈ مارشل سید عاصم منیر کی تعریف

انہوں نے کہا کہ جنگیں میڈیا کی بیان بازی،  درآمد شدہ  فینسی جنگی ساز و سامان  یا سیاسی نعرے بازی سے نہیں جیتی جاتیں، جنگیں یقینِ محکم، پیشہ ورانہ قابلیت، آپریشنل شفافیت، اداروں کی مضبوطی اور قومی عزم وحوصلےکے ذریعے جیتی جاتی ہیں۔

فیلڈ مارشل نے پاکستان کی مسلح افواج کی پیشہ ورانہ مہارت، جذبے اورجنگی  تیاری پر مکمل اعتماد کا اظہار کیا، فیلڈ مارشل نے  فارغ التحصیل افسران پر زور دیا کہ ’ وہ دیانتداری، بے لوث خدمت اور قوم کے لیے غیر متزلزل عزم پر ثابت قدم رہیں‘۔