چین کی فضائیہ کے چیف آف اسٹاف کی ایئر ہیڈ کوارٹرز اسلام آباد میں ایئر چیف سے ملاقات

ویب ڈیسک۔ پیپلز لبریشن آرمی ایئر فورس کے چیف آف اسٹاف لیفٹیننٹ جنرل وانگ گینگ کی قیادت میں ایک اعلیٰ سطحی دفاعی وفد نے ایئر ہیڈ کوارٹرز اسلام آباد کا دورہ کیا اور پاک فضائیہ کے سربراہ ایئر چیف مارشل ظہیر احمد بابر سدھو سے ملاقات کی۔

ایئر چیف نے معزز مہمانوں کا پرتپاک استقبال کرتے ہوئے کہا کہ پاکستان اور چین کے درمیان تعلقات تاریخی نوعیت کے ہیں، جن کی بنیاد باہمی اعتماد، تزویراتی ہم آہنگی، اور علاقائی امن و استحکام کے لیے مشترکہ عزم پر ہے۔

لیفٹیننٹ جنرل وانگ گینگ نے پاک فضائیہ کی آپریشنل تیاریوں، جدید صلاحیتوں، اور ملٹی ڈومین آپریشنز کو بھرپور سراہا۔ انہوں نے ان آپریشنز کو جدید فضائی جنگ کا اہم عنصر قرار دیا اور کہا کہ پیپلز لبریشن آرمی ایئر فورس، پاک فضائیہ کے ان تجربات سے سیکھنے میں گہری دلچسپی رکھتی ہے۔

یہ بھی پڑھیں: ایران نے دفاعی نظام کو فعال کرنے کے لیے چین سے جدید فضائی میزائل سسٹمز حاصل کر لیے، مڈل ایسٹ آئی

ملاقات کے دوران معزز مہمان نے پاک فضائیہ کی قیادت کی پیشہ ورانہ مہارت اور دور اندیشی کو سراہا اور بھارت کے ساتھ حالیہ تنازع میں پاک فضائیہ کی مثالی کارکردگی کو زبردست خراجِ تحسین پیش کیا۔ انہوں نے ایئر چیف کی قیادت میں پائلٹس کی طرف سے دیے گئے فیصلہ کن اور مؤثر ردعمل کی خاص طور پر تعریف کی۔

یہ ملاقات پاک چین دفاعی تعلقات کے فروغ اور خطے میں امن و استحکام کے لیے دونوں ممالک کے تعاون کے عزم کی عکاس ہے۔