ہمارے شہدا کا خون رائیگاں نہیں جائے گا، کورکمانڈرز کانفرنس کے شرکا کا عزم

راولپنڈی: فیلڈ مارشل سید عاصم منیر، نشانِ امتیاز (ملٹری) کی زیر صدارت کور کمانڈرز کانفرنس منعقد ہوئی، جس میں حالیہ قومی و بین الاقوامی حالات، سیکیورٹی امور اور دفاعی حکمت عملی کا تفصیلی جائزہ لیا گیا۔

پاک فوج کے شعبہ تعلقات عامہ (آئی ایس پی آر) کے مطابق کانفرنس کا آغاز بھارتی سپانسرڈ پراکسیوں کے ہاتھوں حالیہ دہشت گردانہ حملوں میں شہید ہونے والے جوانوں کے ایصالِ ثواب کے لیے فاتحہ خوانی سے کیا گیا۔ فورم نے دہشت گرد پراکسیز کے خلاف سیکیورٹی فورسز کی حالیہ کامیابیوں کا جائزہ لیتے ہوئے اس عزم کا اظہار کیا کہ ہمارے شہداء کا خون رائیگاں نہیں جائے گا۔

فورم نے اس بات پر زور دیا کہ پاکستان کے عوام کا تحفظ اور سلامتی مسلح افواج کی اولین ترجیح ہے۔ اس موقع پر فورم نے یہ بھی واضح کیا کہ بھارتی حمایت یافتہ اور اسپانسرڈ پراکسیز کے خلاف ہر سطح پر فیصلہ کن اور جامع کارروائیاں جاری رکھنا ناگزیر ہے۔

آئی ایس پی آر کے مطابق کانفرنس میں اس امر کی نشاندہی کی گئی کہ پہلگام واقعے میں واضح شکست کے بعد بھارت اب فتنہ الخوارج اور فتنہ الہندوستان کی پراکسیز کے ذریعے اپنے مذموم ایجنڈے کو آگے بڑھانے کی کوشش کر رہا ہے۔

ترجمان پاک فوج کے مطابق آرمی چیف نے وزیر اعظم پاکستان کے ہمراہ ایران، ترکیہ، آذربائیجان، سعودی عرب اور متحدہ عرب امارات کے حالیہ کامیاب دوروں پر پاکستان کے فعال سفارتی کردار سے فورم کو آگاہ کیا۔ فورم کو آرمی چیف کے تاریخی دورۂ امریکہ سے متعلق بھی بریفنگ دی گئی، جس کے دوران اعلیٰ سطحی امریکی قیادت کو دو طرفہ معاملات، علاقائی اور بین الاقوامی امور پر پاکستان کا بامقصد مؤقف براہِ راست پیش کیا گیا۔

یہ بھی پڑھیں: ’را ‘کی پراکسی عادل راجہ فیلڈ مارشل کو صدر بنوانے پر تُلا ہوا ہے، سینئر صحافی جبار چوہدری

آئی ایس پی آر کے مطابق فورم نے مشرق وسطیٰ اور ایران کی حالیہ پیش رفت کے تناظر میں داخلی و خارجی سلامتی کے اُمور کا تفصیلی جائزہ لیا، اور اس بات پر تشویش ظاہر کی کہ دنیا میں طاقت کے استعمال کو ایک ترجیحی پالیسی ٹول کے طور پر اختیار کرنے کا رجحان بڑھتا جا رہا ہے۔ فورم نے کہا کہ یہ بدلتا ہوا رجحان پاکستان کے لیے نہ صرف خود انحصاری کی صلاحیتوں کو بڑھانے بلکہ قومی اتحاد اور عزم کی اہمیت کو بھی ناگزیر بنا دیتا ہے۔

آرمی چیف نے بھارت کی طرف سے دوطرفہ فوجی کشیدگی میں کسی تیسرے فریق کو شامل کرنے کی کوشش کو بھارت کی بلاک پولیٹکس کو فروغ دینے کی بے بنیاد کوشش قرار دیا۔ ان کا کہنا تھا کہ اس بھونڈی کوشش کا مقصد بھارت کا خطے میں نیٹ سیکیورٹی پرووائڈر کے خود ساختہ کردار کو گمراہ کن انداز میں پیش کرنا ہے۔

انہوں نے مزید کہا کہ دنیا اب بھارت کے توسیع پسندانہ عزائم اور ہندوتوا انتہاپسندی کے خطرناک رجحانات سے واضح طور پر بدظن ہو رہی ہے۔

یہ بھی پڑھیں: کوئی بھی پاکستان کے ’ایٹمی اثاثوں‘ کو نشانہ بنانے کی جرات نہیں کرسکتا، ڈی جی آئی ایس پی آر

فورم کو جنگ کی بدلتی ہوئی نوعیت اور ابھرتے ہوئے خطرات کے پیش نظر پاک فوج کی حکمت عملی اور جاری جدید اقدامات سے بھی آگاہ کیا گیا۔ آرمی چیف نے پاک بحریہ اور پاک فضائیہ کی قیادت کو ٹرائی سروسز ہم آہنگی کو مضبوط بنانے پر سراہا۔

کانفرنس کے اختتام پر آرمی چیف نے ملک کو درپیش تمام خطرات کے خلاف پاک فوج کی آپریشنل تیاریوں پر مکمل اعتماد کا اظہار کیا۔