ترک خبر رساں ادارے انادولو نے ایرانی میڈیا کے حوالے سے خبر دی ہے کہ 17 جون کو اسرائیلی حملے کے وقت ایرانی صدر اور اعلیٰ قیادت ایک محفوظ مقام پر میٹنگ کر رہے تھے۔
رپورٹس کے مطابق اسرائیل نے اس عمارت کو نشانہ بناتے ہوئے اس کے داخلی اور خارجی راستوں پر 6 میزائل داغے، اگرچہ صدر پزشکیان کی ٹانگ پر معمولی زخم آیا، تاہم وہ دیگر حکام کے ساتھ بحفاظت باہر نکلنے میں کامیاب رہے۔
ایرانی نیوز ایجنسی فارس کے مطابق اسی نوعیت کا حملہ ماضی میں حزب اللہ کے سابق سربراہ حسن نصر اللہ پر بھی ہو چکا ہے، جس سے اس شبہے کو تقویت ملتی ہے کہ اہم معلومات اندرونی ذرائع سے لیک ہو رہی ہیں۔
اسرائیلی کارروائیاں 13 جون کو شروع ہوئیں جن میں ایران کے جوہری مراکز، عسکری دفاتر اور شہری آبادی کو نشانہ بنایا گیا۔ اب تک ان حملوں میں 606 ایرانی شہری شہید جبکہ 5,000 سے زائد زخمی ہو چکے ہیں۔
جواب میں ایران نے کارروائی کرتے ہوئے 29 اسرائیلی شہریوں کو ہلاک اور 3,400 کو زخمی کیا۔ یہ جھڑپیں 24 جون کو امریکی ثالثی کے نتیجے میں رک گئیں، تاہم خطے میں تناؤ بدستور برقرار ہے۔
By 
