لاہور: نیشنل سائبر کرائم انویسٹی گیشن ایجنسی (NCCIA) لاہور زون نے علیمہ خان کو ریاست مخالف سوشل میڈیا سرگرمیوں کے الزام میں نوٹس جاری کر دیا ہے۔ ذرائع کے مطابق علیمہ خان کو ہدایت کی گئی ہے کہ وہ 17 جولائی کو صبح 11 بج کر 30 منٹ پر ذاتی طور پر NCCIA کے دفتر، گلبرگ-II لاہور میں پیش ہوں۔
نوٹس میں کہا گیا ہے کہ طلبی کا مقصد علیمہ خان کا بیان ریکارڈ کرنا ہے تاکہ وہ اپنے دفاع میں مؤقف پیش کر سکیں۔ یہ کارروائی انکوائری نمبر 2531/25، مورخہ 27 مئی 2025 کے تحت کی جا رہی ہے۔
ذرائع کا کہنا ہے کہ علیمہ خان پر الزام ہے کہ وہ سوشل میڈیا کے ذریعے ریاست مخالف سرگرمیوں میں ملوث رہی ہیں۔ نوٹس میں خبردار کیا گیا ہے کہ اگر وہ طلبی پر حاضر نہ ہوئیں تو یہ تصور کیا جائے گا کہ ان کے پاس اپنے دفاع میں پیش کرنے کو کچھ نہیں ہے، اور عدم حاضری کی صورت میں قانونی کارروائی کو آگے بڑھایا جائے گا۔
نوٹس کے مطابق طلبی پر عمل نہ کرنے کی صورت میں علیمہ خان کے خلاف تعزیرات پاکستان کی دفعہ 174 کے تحت کارروائی عمل میں لائی جا سکتی ہے۔ ذرائع نے مزید بتایا کہ نیشنل سائبر کرائم انویسٹی گیشن ایجنسی وزارت داخلہ کے ماتحت ادارہ ہے۔
By 
