مون سون بارشوں سے ملک بھر میں 124 افراد جاں بحق، 264 زخمی، رپورٹ جاری

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے مون سون بارشوں سے ہونے والے نقصانات کی رپورٹ جاری کر دی ہے۔

رپورٹ کے مطابق مون سون بارشوں کے نتیجے میں ملک بھر میں 124 افراد جاں بحق جبکہ 264 زخمی ہوئے۔ پنجاب میں سب سے زیادہ جانی نقصان ہوا، جہاں 49 افراد جاں بحق اور 158 زخمی ہوئے، جاں بحق افراد میں 28 بچے بھی شامل ہیں۔

خیبرپختونخوا میں 38 افراد جاں کی بازی ہار گئے جبکہ 57 زخمی ہوئے۔ سندھ میں 20 افراد جاں بحق اور 40 زخمی، جبکہ بلوچستان میں 16 اموات اور 4 افراد زخمی ہوئے۔

رپورٹ کے مطابق آزاد کشمیر میں ایک شخص جاں بحق ہوا، اور بارشوں سے سب سے زیادہ اموات بچوں کی ہوئیں۔

یہ بھی پڑھیں: ملک بھر میں مون سون بارشوں کا تباہ کن اسپیل، چوبیس گھنٹوں میں مزید 37 افراد جاں بحق

این ڈی ایم اے کی رپورٹ کے مطابق ملک بھر میں مون سون بارشوں کے باعث اب تک 522 گھروں کو نقصان پہنچا ہے، جن میں سے 367 گھر جزوی طور پر جبکہ 155 مکمل طور پر تباہ ہوئے۔

بارشوں سے 9 پل متاثر ہوئے، ساڑھے 10 کلومیٹر سڑکوں کو نقصان پہنچا، جبکہ 126 مویشی بھی سیلابی ریلوں میں بہہ گئے۔