مودی کے ’سافٹ پاور‘ دعوے کی قلعی کھل گئی، 60 ہزار ڈالر کا فراڈ، نیویارک میں بھارتی نجومی رنگے ہاتھوں گرفتار

بھارت کے سافٹ پاور کا دعویٰ ایک بار پھر دھوکا دہی اور جعلسازی کی دلدل میں دھنستا نظر آ رہا ہے۔ بھارتی وزیر اعظم نریندر مودی کے بھارت کو ’وِشوا گرو‘ (عالمی رہنما) بنانے کے بلند بانگ دعوے اس وقت دنیا کے سامنے بے نقاب ہو گئے جب نیویارک پولیس نے بھارتی نجومی ہیمانتھ کمار منیپا کو ایک امریکی خاتون کے ساتھ 60,000 ڈالر فراڈ کرنے کے الزام میں رنگے ہاتھوں گرفتار کر لیا۔

یہ بھی پڑھیں:پہلگام واقعہ، حملے آوروں کو بھارتی فورسز نے فرار ہونے دیا، مودی سرکار کا ڈرامہ بے نقاب

امریکی خبر رساں ایجنسی سی بی ایس نیوز کی رپورٹ کے مطابق، ایک بھارتی شہری نے 68 سالہ امریکی خاتون سے روحانی عملیات، بری نظر کے خاتمے اور برکتوں کی آڑ میں رقم بٹوری گئی۔ دھوکا دہی کا آغاز 20,000 ڈالر سے ہوا، جس کے بعد مزید 42,000 ڈالر مانگے گئے۔

نیو یارک پولیس کے مطابق، روحانی عملیات کے دعویدار بھارتی نجومی منیپا نے 3 جولائی کو خاتون سے فال نکالنے کے عوض ابتدائی رقم وصول کی۔ بعد ازاں خاتون کو ساؤتھ براڈوے پر واقع ’انجنہ جی ‘ کے مقام پر دوبارہ بلایا گیا اور مزید رقم کا تقاضا کیا گیا۔ بھارتی نجومی نے خاتون کو ایک بینک میں لے جا کر رقم نکلوانے پر مجبور کیا، لیکن پولیس نے خاتون کے شبہات پر فوری کارروائی کرتے ہوئے ہِکس وائل کے مقام پر کمار منیپا کو گرفتار کر لیا۔

مزید پڑھیں:بھارتی قیادت اپنی ساکھ بحال کرنے کیلئے کچھ نہ کچھ کریگی، خواجہ آصف

نیویارک ریاستی قانون کے تحت روحانی طاقتوں کے جھوٹے دعوؤں پر رقم لینا جرم ہے۔ اس گرفتاری نے بھارتی معاشرے میں پنپتے اُس کلچر کی عالمی سطح پر نشاندہی کر دی ہے، جس میں جعلی عملیات، جادو ٹونے اور دھوکا دہی کو روحانیت کا لبادہ اوڑھا دیا جاتا ہے۔

بھارت کی سافٹ پاور یا فراڈ پاور؟

مودی سرکار یوگا، بالی ووڈ اور شانتی کے نعرے کے پیچھے بھارت کو دنیا کے لیے ایک روحانی رہنما کے طور پر پیش کرتی رہی ہے، لیکن حقیقت میں نریندر مودی کا بھارت ایک ایسے بین الاقوامی فراڈ نیٹ ورک میں بدل چکا ہے جہاں روحانیت کی آڑ میں لوگوں کو لوٹا جا رہا ہے۔ یہ واقعہ اس بات کا ثبوت ہے کہ بھارت کی سافٹ پاور دراصل ایک فریب پاور بنتی جا رہی ہے۔

عالمی سطح پر بھارتی فراڈ کلچر کا پھیلاؤ

یہ کوئی پہلا واقعہ نہیں ہے، ماضی میں بھی بھارتی نجومی، جعلی گرو اور عملیات کرنے والے افراد مختلف ممالک میں اس قسم کی دھوکا دہی میں ملوث پائے گئے ہیں۔ بھارت میں پیدا ہونے والا یہ کلچر اب عالمی وبا کی شکل اختیار کر چکا ہے، جہاں معصوم لوگوں کو دھوکا دے کر پیسے بٹورے جا رہے ہیں۔

یہ واقعہ نہ صرف بھارت کی بین الاقوامی ساکھ پر سوالیہ نشان ہے بلکہ مودی حکومت کے سافٹ پاور کے بیانیے کے منہ پر بھی ایک زوردار طمانچہ ہے۔