ٹک ٹاک نے پاکستانی صارفین کی کروڑوں ویڈیوز ڈیلیٹ کردیں

ویب ڈیسک: ویڈیو شیئرنگ ایپ ٹک ٹاک نے 2025 کی پہلی سہ ماہی کے دوران پاکستانی صارفین کی تقریباً ڈھائی کروڑ ویڈیوز پلیٹ فارم سے ہٹا دیں۔

یہ انکشاف کمپنی کی جانب سے جاری کردہ ایک رپورٹ میں کیا گیا ہے۔ یاد رہے کہ ٹک ٹاک پر روزانہ کروڑوں ویڈیوز اپ لوڈ کی جاتی ہیں، جن کے مواد کی جانچ کمیونٹی گائیڈ لائنز کے مطابق کی جاتی ہے۔

اسی حوالے سے ٹک ٹاک نے 2025 کی پہلی سہ ماہی کے لیے کمیونٹی گائیڈ لائنز کے نفاذ کی رپورٹ جاری کی ہے۔ رپورٹ کے مطابق، جنوری سے مارچ 2025 کے دوران دنیا بھر میں 21 کروڑ 10 لاکھ 97 ہزار 307 ویڈیوز کمیونٹی گائیڈ لائنز کی خلاف ورزی کی بنیاد پر حذف کی گئیں۔

یہ تعداد اپ لوڈ کی گئی کل ویڈیوز کا تقریباً 0.9 فیصد بنتی ہے۔ حذف کی گئی ویڈیوز میں سے 18 کروڑ 43 لاکھ سے زائد ویڈیوز خودکار نظام کے ذریعے شناخت کر کے ہٹائی گئیں، جن میں سے 75 لاکھ سے زائد ویڈیوز بعد ازاں جانچ پڑتال کے بعد دوبارہ بحال کی گئیں۔

یہ بھی پڑھیں: امریکی کی جانب سے فروخت کا خدشہ، ٹک ٹاک نے نیا ایپ ورژن تیار کرنا شروع کردیا

کمپنی کے مطابق، پیشگی حذف کی گئی ویڈیوز کی شرح 99 فیصد رہی، جب کہ 94.3 فیصد مواد کو پوسٹ کیے جانے کے 24 گھنٹوں کے اندر ہی پلیٹ فارم سے ہٹا دیا گیا۔ پاکستان میں اس مدت کے دوران 2 کروڑ 49 لاکھ 54 ہزار سے زائد ویڈیوز کو ڈیلیٹ کیا گیا۔

کمپنی کا کہنا ہے کہ گائیڈ لائنز کی خلاف ورزی پر حذف کی جانے والی تقریباً 95.8 فیصد ویڈیوز کو پوسٹ کیے جانے کے 24 گھنٹوں کے اندر پلیٹ فارم سے ہٹا دیا گیا۔ رپورٹ کے مطابق، حذف کی گئی 30.1 فیصد ویڈیوز حساس یا بالغ موضوعات پر مشتمل تھیں، جو ٹک ٹاک کی پالیسی کے مطابق قابل قبول نہیں تھیں۔

11.5 فیصد ویڈیوز میں پلیٹ فارم کے تحفظ اور شائستگی کے معیارات کی خلاف ورزی کی گئی، جبکہ 15.6 فیصد ویڈیوز پرائیویسی اور سیکیورٹی ہدایات کے خلاف تھیں۔ حذف شدہ ویڈیوز میں سے 45.5 فیصد کو غلط معلومات کے طور پر نشان زد کیا گیا، اور 13.8 فیصد ویڈیوز کو ترمیم شدہ میڈیا یا مصنوعی ذہانت سے تیار کردہ مواد کے طور پر شناخت کیا گیا۔

یہ بھی پڑھیں: ٹک ٹاک نے نیا زبردست فیچر متعارف کروا دیا