اسحاق ڈار اور امریکی وزیر خارجہ مارکو روبیو کی ملاقات، دوطرفہ تعلقات، اقتصادی تعاون اور علاقائی سلامتی پر تبادلہ خیال

ویب ڈیسک۔ واشنگٹن ڈی سی میں پاکستان کے نائب وزیر اعظم و وزیر خارجہ سینیٹر اسحاق ڈار اور امریکی وزیر خارجہ مارکو روبیو کے درمیان اہم ملاقات ہوئی۔ یہ دونوں رہنماؤں کی پہلی بالمشافہ ملاقات تھی جس میں دوطرفہ تعلقات، اقتصادی تعاون اور علاقائی سلامتی پر تبادلہ خیال کیا گیا۔ ملاقات میں پاکستان اور امریکہ کے درمیان مختلف شعبوں میں تعاون کو مزید مضبوط بنانے کے عزم کا اظہار کیا گیا۔

واشنگٹن ڈی سی میں ہونے والی اس ملاقات میں دوطرفہ تعلقات، اقتصادی تعاون، علاقائی امن اور انسداد دہشت گردی جیسے اہم امور پر تفصیلی گفتگو کی گئی۔

اس موقع پر امریکہ میں پاکستان کے سفیر رضوان سعید شیخ بھی نائب وزیر اعظم کے ہمراہ موجود تھے۔ ملاقات امریکی محکمہ خارجہ (اسٹیٹ ڈیپارٹمنٹ) میں ہوئی جہاں اسحاق ڈار کا اعلیٰ امریکی حکام نے پرتباک استقبال کیا۔

یہ دونوں وزرائے خارجہ کے درمیان پہلا بالمشافہ رابطہ تھا، اس سے قبل ان کے درمیان ٹیلی فون پر گفتگو ہو چکی تھی۔ وفود کی سطح پر ہونے والی اس ملاقات میں دونوں جانب سے سینئر حکام شریک تھے۔

یہ بھی پڑھیں: پاکستان کے نائب وزیرِاعظم/وزیرِ خارجہ کا اقوام متحدہ کی سلامتی کونسل کے اہم اجلاسوں میں شرکت کے لیے امریکہ کا دورہ

بات چیت میں تجارت، سرمایہ کاری، زراعت، ٹیکنالوجی اور معدنیات سمیت مختلف شعبوں میں ممکنہ تعاون پر بات کی گئی۔ اسحاق ڈار نے صدر ٹرمپ اور امریکی قیادت کی امن کوششوں کو سراہا، جبکہ مارکو روبیو نے دہشت گردی کے خلاف پاکستان کی قربانیوں کا اعتراف کیا اور علاقائی امن میں پاکستان کے مثبت کردار کو سراہا۔

نائب وزیر اعظم نے کہا کہ پاکستان امریکی کاروباری برادری کے لیے ایک پرکشش منزل ہے اور دونوں ممالک کے درمیان جاری ٹریڈ ڈائیلاگ میں مثبت پیش رفت کی امید ہے۔ انہوں نے کہا کہ امریکہ میں موجود پاکستانی کمیونٹی دونوں ملکوں کے درمیان تعلقات کو مضبوط بنانے میں پل کا کردار ادا کر رہی ہے۔

ملاقات کے دوران دونوں وزرائے خارجہ نے مختلف شعبہ جات میں روابط مضبوط بنانے اور دوطرفہ تعاون کو مزید وسعت دینے کے عزم کا اعادہ کیا۔

یہ بھی پڑھیں: امریکہ نے یوکرینی صدر کو ہٹانے کا فیصلہ کرلیا، امریکی صحافی کا دعویٰ