کلاؤڈ برسٹ سے جھیل سیف الملوک روڈ بند

خیبرپختونخوا کے علاقے ناران میں کلاؤڈ برسٹ کے باعث جھیل سیف الملوک کی جانب جانے والا روڈ بند ہوگیا، تاہم فوری اقدامات کے نتیجے میں 500 سے زائد سیاحوں کو باحفاظت ریسکیو کرلیا گیا۔

ایکسپریس نیوز کے مطابق، ناران میں کلاؤڈ برسٹ کے بعد جھیل سیف الملوک روڈ بند ہونے سے متعدد سیاح وہاں پھنس گئے تھے۔ خیبرپختونخوا کی انتظامیہ نے فوری کارروائی کرتے ہوئے تمام سیاحوں کو محفوظ مقام پر منتقل کر دیا۔

کاغان ڈیویلپمنٹ اتھارٹی، ٹورازم پولیس اور ریسکیو اداروں کی مشترکہ کارروائی سے 117 سے زائد جیپوں کے لیے راستہ بحال کر دیا گیا۔

یہ بھی پڑھیں: ملک میں شدید بارشیں اور سیلابی صورتحال، این ڈی ایم اے نے خبردار کردیا

خیبرپختونخوا کے سیکریٹری سیاحت ڈاکٹر عبدالصمد کا کہنا تھا کہ محکمہ سیاحت صوبے میں سیاحوں کی مکمل حفاظت کو یقینی بنا رہا ہے اور کسی بھی ہنگامی صورتحال میں سیاح 1422 ہیلپ لائن پر رابطہ کر سکتے ہیں۔

انہوں نے مزید بتایا کہ کاغان ڈیویلپمنٹ اتھارٹی کی بھاری مشینری نے راستے سے ملبہ ہٹا کر سڑک کو صاف کر دیا ہے۔