ملک بھر میں بارشیں کب تک جاری رہیں گی؟ نیا الرٹ جاری

نیشنل ڈیزاسٹر مینجمنٹ اتھارٹی (این ڈی ایم اے) نے 28 جولائی سے 31 جولائی تک ملک کے مختلف علاقوں میں شدید بارشوں، طغیانی، لینڈ سلائیڈنگ اور ممکنہ سیلاب کے خدشے کے پیش نظر الرٹ جاری کر دیا ہے۔

تفصیلات کے مطابق، این ڈی ایم اے نے پنجاب، خیبرپختونخوا، گلگت بلتستان اور آزاد کشمیر کے لیے موسمی صورتحال سے متعلق الرٹ جاری کیا ہے۔ ان علاقوں میں 28 تا 31 جولائی کے دوران متوقع بارشوں کے سبب سیلاب اور لینڈ سلائیڈنگ کا امکان ظاہر کیا گیا ہے۔

پنجاب کے اضلاع سرگودھا، حافظ آباد، گوجرانوالہ، گجرات، سیالکوٹ، فیصل آباد، لاہور اور نارووال میں شدید بارشیں متوقع ہیں، جبکہ جنوبی پنجاب کے اضلاع ڈیرہ غازی خان، راجن پور اور رحیم یار خان میں درمیانے درجے کی بارشیں اور پہاڑی نالوں میں تیز بہاؤ کا خدشہ ہے۔

پیر پنجال کے پہاڑی سلسلے سے گزرنے والے نالوں میں بھی پانی کے بہاؤ میں درمیانے درجے کے اضافے کی پیشگوئی کی گئی ہے۔ خیبرپختونخوا کے اضلاع کوہستان، سوات، ملاکنڈ، دیر، بونیر اور ان سے ملحقہ ندی نالوں اور دریاؤں میں طغیانی کا خطرہ ہے۔

یہ بھی پڑھیں: پنجاب سمیت ملک میں مزید بارشیں متوقع ، پی ڈی ایم اے نے خبردار کردیا

دریائے سوات، پنجکوڑہ، بارہ اور کلپانی نالہ میں پانی کی سطح بلند ہونے کی توقع ہے، جس کے باعث دریائے کابل میں نوشہرہ کے مقام پر بہاؤ میں اضافہ ممکن ہے۔ چترال، بونی اور ریشون میں گلیشیئر کے پگھلنے اور ممکنہ بارشوں کی وجہ سے دریائے چترال میں بھی پانی کی سطح بڑھ سکتی ہے۔

گلگت، اسکردو، ہنزہ، شگر، مظفرآباد، وادی نیلم اور باغ میں بارشوں سے لینڈ سلائیڈنگ اور ندی نالوں میں سیلاب کا خدشہ ظاہر کیا گیا ہے۔ جبکہ مظفرآباد، باغ، پشاور، مردان، نوشہرہ اور ایبٹ آباد جیسے شہری علاقوں میں بھی سیلابی صورتحال پیدا ہونے کا امکان ہے۔

این ڈی ایم اے نے تمام متعلقہ اداروں کو ہدایات جاری کی ہیں کہ وہ ممکنہ صورتحال کے پیش نظر پیشگی اقدامات کریں، اہلکار، مشینری اور ریسکیو ٹیمیں الرٹ رکھیں، جبکہ مقامی انتظامیہ اور پی ڈی ایم ایز کو بھی بروقت ردعمل اور تیاری کی ہدایت جاری کی گئی ہے۔

یہ بھی پڑھیں: ملک میں شدید بارشیں اور سیلابی صورتحال، این ڈی ایم اے نے خبردار کردیا