پیٹرول اور ڈیزل سستا، مٹی کا تیل اور لائٹ ڈیزل مہنگا ہونے کا امکان

اسلام آباد: پاکستان میں یکم اگست سے پیٹرول اور ڈیزل کی قیمتوں میں کمی جبکہ مٹی کا تیل اور لائٹ ڈیزل کی قیمتوں میں اضافے کا امکان ظاہر کیا جا رہا ہے۔

ذرائع کے مطابق، یکم اگست سے پیٹرول کی قیمت میں 9 روپے 7 پیسے فی لیٹر اور ڈیزل کی قیمت میں 3 روپے 73 پیسے فی لیٹر کمی متوقع ہے۔ اس کے برعکس، مٹی کا تیل 3 روپے 55 پیسے اور لائٹ ڈیزل 2 روپے 33 پیسے فی لیٹر مہنگا ہونے کا امکان ہے۔

اوگرا (OGRA) اس حوالے سے 31 جولائی کو سمری تیار کر کے پیٹرولیم ڈویژن کو ارسال کرے گا۔

حکومت کی جانب سے پیٹرولیم مصنوعات کی قیمتوں میں رد و بدل کی حتمی منظوری وزیراعظم شہباز شریف دیں گے، اور نئی قیمتوں کا اطلاق یکم اگست سے ہوگا۔

یاد رہے کہ گزشتہ بار 15 جولائی کو پیٹرولیم مصنوعات کی قیمتوں میں اضافہ کیا گیا تھا۔ اس وقت پیٹرول 5 روپے 36 پیسے اور ہائی اسپیڈ ڈیزل 11 روپے 37 پیسے فی لیٹر مہنگا کیا گیا تھا، جبکہ لائٹ ڈیزل کی قیمت میں 1 روپے 85 پیسے فی لیٹر کمی کی گئی تھی۔

یہ بھی پڑھیں: حکومت کا پٹرول پمپس پر پٹرول اور ڈیزل کی چوری روکنے کے لیے منفرد اقدام

اس وقت پیٹرول کی قیمت 272 روپے 15 پیسے اور ہائی اسپیڈ ڈیزل کی قیمت 284 روپے 35 پیسے فی لیٹر ہے۔

اس سے قبل، یکم جولائی کو بھی پیٹرولیم مصنوعات کی قیمتوں میں 10 روپے 39 پیسے فی لیٹر اضافہ کیا گیا تھا۔ پیٹرول کی قیمت میں 8 روپے 36 پیسے اضافے کے بعد وہ 258 روپے 43 پیسے سے بڑھ کر 266 روپے 79 پیسے فی لیٹر ہوئی تھی۔ اسی طرح ہائی اسپیڈ ڈیزل کی قیمت میں 10 روپے 39 پیسے اضافے کے بعد وہ 262 روپے 59 پیسے سے بڑھ کر 272 روپے 98 پیسے فی لیٹر تک پہنچ گئی تھی۔