اسلام آباد کو کیش لیس سٹی بنانے کا فیصلہ، ڈیجیٹل ادائیگیوں کا منصوبہ متعارف

ویب ڈیسک۔ اسلام آباد کو مکمل طور پر کیش لیس سٹی بنانے کے لیے کیپیٹل ڈیولپمنٹ اتھارٹی (سی ڈی اے) بھرپور تیاریوں میں مصروف ہے جس کا آغاز روزمرہ خدمات جیسے ٹیکس، بلز اور پارکنگ کی ادائیگی کے نئے طریقہ کار سے کیا جا رہا ہے۔

چیئرمین سی ڈی اے محمد علی رندھاوا کی زیر صدارت ہونے والے ایک اعلیٰ سطحی اجلاس کے بعد تمام محکموں میں ڈیجیٹل ادائیگیوں کے نفاذ کے منصوبے کا اعلان کیا گیا ہے۔ جائیداد ٹیکس، پانی کے بل، زمین کی منتقلی اور پارکنگ فیس سمیت دیگر ادائیگیوں کے لیے شہری جلد ہی صرف کیو آر کوڈ اسکین کر کے یا موبائل ایپ پر چند بٹن دباکر ادائیگیاں کر سکیں گے۔

چیئرمین رندھاوا نے کہا کہ کیش لیس نظام میں منتقلی نہ صرف شفافیت کو فروغ دے گی بلکہ عوامی خدمات کی فراہمی کی رفتار کو بھی بہتر بنائے گی۔ ہمارا ہدف اسلام آباد کو ایک حقیقی ڈیجیٹل دارالحکومت بنانا ہے ۔ اسمارٹ، مؤثر اور شہری دوست۔

سی ڈی اے اس مقصد کے لیے معروف بینکوں کے ساتھ شراکت داری بھی کر رہا ہے تاکہ ایک محفوظ اور آسان آن لائن ادائیگی کا نظام قائم کیا جا سکے۔

یہ بھی پڑھیں: اسلام آباد میں گدھے کا گوشت برآمد ہونے کا معاملہ،ہوشربا تفصیلات سامنے آگئیں

یہ مکمل منصوبہ ایک جامع حکمت عملی کا حصہ ہے جس کا مقصد نقدی لین دین کا خاتمہ، طویل قطاروں میں انتظار کا خاتمہ، اور شہری خدمات کو زیادہ آسان اور شفاف بنانا ہے۔

اجلاس کے بعد ایک سینئر سی ڈی اے اہلکار نے میڈیا کے نمائندوں کو بتایا کہ سوچیں کہ آپ کو پانی کا بل ادا کرنے کے لیے نہ قطار میں کھڑا ہونا پڑے اور نہ نقد رقم ساتھ لانی پڑے۔ یہی وہ مستقبل ہے جو ہم تعمیر کر رہے ہیں۔

منصوبے کے پہلے مرحلے میں ان علاقوں اور خدمات پر توجہ دی جائے گی جہاں عوامی آمدورفت زیادہ ہوتی ہے اور استعمال کی شرح بلند ہے۔ اس ماڈل کی کامیابی کے بعد اسے پورے شہر میں وسعت دی جائے گی۔

یہ بھی پڑھیں: اسلام آباد میں داخل ہونیوالی تمام گاڑیوں پر ایم ٹیگ لازمی، پارکنگ میٹرز لگانے کا فیصلہ