حکومت سندھ نے صوبے بھر میں 9 اگست کو عام تعطیل کا اعلان کیا ہے اور اس حوالےسے باضابطہ نوٹیفکیشن بھی جاری کر دیا گیا ہے۔
تفصیلات کے مطابق سندھ حکومت نے صوفی شاعر حضرت شاہ عبدالطیف بھٹائیؒ کے 282 ویں سالانہ عرس کی مناسبت سے 9 اگست بروز ہفتہ کو صوبے بھر میں عام تعطیل کا اعلان کر دیا ہے، عام تعطیل کا باضابطہ نوٹیفکیشن بھی جاری کر دیا گیا ہے۔
اس حوالے سے سیکریٹری ثقافت سندھ محمد خان کلہوڑو کا کہنا ہے کہ تین روزہ عرس کی تقریبات کا آغاز 9 اگست سے ہوگا، جس کے لیے تیاریاں بھی مکمل کر لی گئی ہیں۔
وزیر ثقافت نے گورنر سندھ کامران ٹیسوری کو عرس کی افتتاحی تقریب میں شرکت کی باضابطہ دعوت بھی دی ہے ، عرس میں ملک بھر سے ہزاروں زائرین، اسکالرز اور شاہ لطیفؒ کے عقیدت مندوں کی شرکت متوقع ہے۔
ڈپٹی کمشنر حیدرآباد نے عرس کے دوران اسلحہ کی نمائش پر پابندی کا حکم بھی جاری کر دیا ہے تاکہ تقریب کے دوران پرامن ماحول کو یقینی بنایا جا سکے۔
حضرت شاہ عبداللطیف بھٹائی کے تین روزہ سالانہ عرس مبارک کی تقریبات ہر سال 14 صفر سے ان کی آخری آرام گاہ والے شہر بھٹ شاہ میں منعقد کی جاتی ہیں۔
یہ سندھ کے اہم ترین روحانی و ثقافتی میلوں میں شمار ہوتا ہے، جس میں صوفی موسیقی، کلامِ لطیف کی محفلیں، علمی و ادبی نشستیں اور دعاؤں کا خصوصی اہتمام کیا جاتا ہے. یہ میلہ محبت، امن اور رواداری کے پیغام کو عام کرنے کا ذریعہ سمجھا جاتا ہے۔
By 
