جشنِ آزادی کا تحفہ! چنگان نے گاڑیوں کی قیمت میں یکدم بڑی کمی کر دی

یومِ آزادی کی خوشی میں گاڑیوں کے خریداروں کے لیے خوشخبری! چنگان پاکستان نے اپنی مقبول سیڈان گاڑی “السوین” کی قیمتوں میں نمایاں کمی کا اعلان کر دیا ہے۔ کمپنی نے اس خصوصی آفر کے تحت السوین کے تمام ویریئنٹس کی قیمت میں 2 لاکھ 75 ہزار روپے تک کی کمی کر دی ہے۔

یہ رعایت محدود مدت کے لیے ہے اور 31 اگست 2025 تک دستیاب رہے گی۔ نئی قیمتوں کے مطابق چنگان السوین کی ابتدائی قیمت اب 40 لاکھ 39 ہزار روپے مقرر کی گئی ہے۔ یہ آفر چنگان کے ملک بھر میں موجود ڈیلر نیٹ ورک کے ذریعے دستیاب ہے اور تمام ویریئنٹس پر لاگو ہوتی ہے۔

چنگان السوین پاکستان میں تین ویریئنٹس میں دستیاب ہے، جن میں 1.3L مینوئل کمفرٹ، 1.5 L ڈی سی ٹی کمفرٹ، اور 1.5 L ڈی سی ٹی لومئیر شامل ہیں۔ ان گاڑیوں میں 1.3 لیٹر اور 1.5 لیٹر کے پیٹرول انجن آپشنز دیے گئے ہیں، جب کہ ٹرانسمیشن کے طور پر 5-اسپیڈ مینوئل یا 5-اسپیڈ ڈوئل کلچ آٹومیٹک گیئر باکس موجود ہے۔ ایندھن کی بچت کا اندازہ 13 سے 15 کلومیٹر فی لیٹر لگایا گیا ہے۔

گاڑی کے اندرونی حصے میں فیبرک سیٹس، 7 انچ ٹچ اسکرین، ریئر ویو کیمرہ، پاور ونڈوز، اور اسٹیئرنگ پر موجود کنٹرولز جیسی سہولیات شامل ہیں۔ حفاظت کے لحاظ سے بھی چنگان السوین میں ڈوئل فرنٹ ایئر بیگز، اینٹی لاک بریکنگ سسٹم (ABS) بمعہ EBD، اور ریئر پارکنگ سینسرز جیسی خصوصیات موجود ہیں۔

چنگان کمپنی کے مطابق یہ خصوصی آفر نہ صرف یومِ آزادی کی خوشی میں دی جا رہی ہے بلکہ بڑھتی مہنگائی اور آٹو فنانسنگ کی لاگت کے باوجود صارفین کی دلچسپی کو برقرار رکھنے کی ایک کوشش بھی ہے۔

پاکستان کی آٹو انڈسٹری میں اگست کا مہینہ ویسے بھی خصوصی ڈسکاؤنٹس اور پروموشنز کے حوالے سے اہم سمجھا جاتا ہے، اور چنگان کی یہ پیشکش مارکیٹ میں اپنی پوزیشن مضبوط کرنے کی جانب ایک مثبت قدم قرار دی جا رہی ہے۔