حسن نواز نے ایک روزہ بین الاقوامی (او ڈی آئی) میچ میں شاندار ڈیبیو کرتے ہوئے ناقابلِ شکست 63 رنز بنا کر پاکستان کو ویسٹ انڈیز کے خلاف سنسنی خیز مقابلے میں 5 وکٹوں سے فتح دلائی۔ یہ 3 میچوں کی سیریز کا پہلا مقابلہ تھا۔
پورٹ آف اسپین، ٹرینیڈاڈ میں کھیلے جانے والے میچ میں281 رنز کے ہدف کے تعاقب میں پاکستان 38ویں اوور میں 177 رنز پر 5 وکٹیں گنوا چکا تھا جب محمد رضوان خان 53 رنز کے اسکور پر شمر جوزف کی گیند پر ایل بی ڈبلیو آؤٹ ہو گئے۔ تب ٹیم دباؤ میں تھی مگر حسن نواز اور حسین طلعت نے چھٹی وکٹ کی شراکت میں ناقابلِ شکست 104 رنز جوڑ کر ٹیم کو فتح دلا دی۔
حسن نواز نے صرف 54 گیندوں پر 63 رنز کی شاندار اننگز کھیلی، جس میں 5 چوکے اور 3 چھکے شامل تھے، جبکہ حسین طلعت نے 37 گیندوں پر 41 رنز بنائے، جس میں ایک چھکا اور 4 چوکے شامل تھے۔
اس سے قبل ویسٹ انڈیز نے پہلے کھیل کا آغاز کیا تو اس کے بلے باز ایون لوئس نے 60 گیندوں پر 62 رنز اسکور کیے، شائی ہوپ کے 55 رنز اور روسٹن چیز کے 53 رنز کی نصف سنچریوں کی بدولت 280 رنز بنائے۔ پاکستان کی جانب سے شاہین شاہ آفریدی نے شاندار بولنگ کا مظاہرہ کرتے ہوئے 4 وکٹیں حاصل کیں، جنہوں نے میچ کے پہلے ہی اوور میں برینڈن کنگ کو 4 رنز پر آؤٹ کیا۔ نسیم شاہ نے بھی آخری لمحات میں 3 وکٹیں حاصل کر کے میزبان ٹیم کی اننگز سمیٹ دی۔
قومی ٹیم کے کپتان محمد رضوان نے ٹاس جیت کر پہلے بولنگ کا فیصلہ کیا، جو درست ثابت ہوا، مگر فتح کی اصل بنیاد حسن نواز کی جرات مندانہ بیٹنگ تھی۔
پاکستان اس فتح کے ساتھ 3 میچوں کی سیریز میں 0-1 کی برتری حاصل کر چکا ہے۔ سیریز کا دوسرا میچ اتوار کو جبکہ آخری میچ منگل کو کھیلا جائے گا۔
By 
