بین الاقوامی تائیکوانڈو چیمپئن شپ، پاکستانی فائٹر محمد عمر خان کا شاندار کارنامہ، گولڈ میڈل جیت لیا

پاکستان نے بین الاقوامی کھیلوں کے میدان میں ایک اور بڑا اعزاز حاصل کیا ہے، جہاں کشمور کی تحصیل گڈو سے تعلق رکھنے والے نوجوان تائیکوانڈو کھلاڑی محمد عمر خان نے ملیشیا میں جاری ہیرو کپ تائیکوانڈو چیمپئن شپ میں طلائی تمغہ (گولڈ میڈل) جیت کر ملک کا نام روشن کر دیا۔

یہ بھی پڑھیں:فجیرہ تائیکوانڈو ٹورنامنٹ: پاکستان کے ہارون خان نے کانسی کا تمغہ جیت لیا

میڈیا رپورٹ کے مطابق محمد عمر خان نے فائنل مرحلے میں اپنے حریف کو شکست دے کر پہلی پوزیشن حاصل کی۔ یہ چیمپئن شپ دنیا کے بہترین تائیکوانڈو کھلاڑیوں کی شرکت کے باعث ایک مشکل ترین مقابلہ تصور کی جاتی ہے۔

عمر خان کی اس شاندار کارکردگی کو نہ صرف ذاتی کامیابی کے طور پر سراہا جا رہا ہے بلکہ اس نے پاکستان، خاص طور پر کشمور کے نام کو عالمی کھیلوں کے نقشے پر اجاگر کر دیا ہے۔

ان کی فتح کی خبر سنتے ہی گڈو میں جشن کا سماں ہے، جہاں اہل علاقہ اپنے مقامی ہیرو کے اعزاز میں تقریبات کی تیاریاں کر رہے ہیں۔ گلیوں اور محلوں میں خوشی کی لہر دوڑ گئی ہے اور ہر کوئی اس نوجوان کی کامیابی پر فخر محسوس کر رہا ہے جس نے پاکستان کا پرچم دنیا کے سامنے بلند کیا۔

مزید پڑھیں:ایشین تائیکوانڈو چیمپیئن شپ: پاکستانی جڑواں بہنوں نے سونے اور کانسی کے تمغے جیت لیے

محمد عمر خان کی کامیابی اس بات کا ثبوت ہے کہ عزم، محنت اور لگن کے ساتھ ایک چھوٹے سے علاقے کا نوجوان بھی عالمی سطح پر کامیابی حاصل کر سکتا ہے۔

ان کا یہ کارنامہ نہ صرف پاکستان کے لیے باعث فخر ہے بلکہ کشمور جیسے پسماندہ علاقے کو بھی عالمی شہرت دلانے کا ذریعہ بن گیا ہے، ایک ایسا لمحہ جو پورے ملک کے لیے قابلِ فخر ہے۔