آذربائیجان نے فیلڈ مارشل سید عاصم منیر کو سب سے بڑے فوجی اعزاز ’پیٹریاٹک وار میڈل‘ سے نواز دیا

آذربائیجان نے صدر الہام علیوف کی جانب سے پاکستان اور آذربائیجان کے درمیان عسکری تعاون میں نمایاں خدمات کے اعتراف میں فیلڈ مارشل سید عاصم منیر کو آذربایجان کے اعلیٰ عسکری اعزاز ’پیٹریاٹک وار میڈل‘ سے نواز دیا۔

پاک فوج کے محکمہ تعلقات عامہ (آئی ایس پی آر) کی جانب سے جاری اعلامیے کے مطابق آذربائیجان کے پہلے نائب وزیر دفاع اور چیف آف جنرل اسٹاف، کرنل جنرل کریم ولیئیف نے آج پاکستان کے چیف آف آرمی اسٹاف (سی او اے ایس) ، فیلڈ مارشل سید عاصم منیر، نشانِ امتیاز (ملٹری) سے جنرل ہیڈکوارٹرز (جی ایچ کیو) راولپنڈی میں ملاقات کی۔

یہ بھی پڑھیں:پاکستان اور آذربائیجان کے درمیان متعدد معاہدوں پر دستخط، دفاعی پیداوار اور تعاون بڑھانے پربھی اتفاق

’آئی ایس پی آر‘ کےمطابق یہ اعلیٰ سطح کی ملاقات پاکستان اور آذربائیجان کے درمیان دفاعی تعاون کو فروغ دینے کی جانب ایک اہم قدم ثابت ہوئی ہے۔

ملاقات کے دوران دونوں عسکری رہنماؤں نے باہمی دلچسپی کے امور پر تبادلہ خیال کیا، خصوصاً خطے اور دنیا کی بدلتی ہوئی سیکیورٹی صورتحال پر بات چیت کی گئی۔ آرمی چیف نے آذر بائیجان کے ساتھ پاکستان کے گہرے برادرانہ تعلقات کو فروغ دینے اعادہ کیا اور دوطرفہ تعاون کو مزید مستحکم کرنے کے عزم کا اظہار کیا۔

فیلڈ مارشل سید عاصم منیر نے آذربائیجان اور آرمینیا کے درمیان امن معاہدے کی کامیاب تکمیل پر کرنل جنرل ولیئیف کو مبارکباد دی۔ اس موقع پر مہمان عسکری رہنما نے ’معرکۂ حق ‘ اور ’آپریشن بنیان مرصوص‘ میں پاکستان کی مسلح افواج کی پیشہ ورانہ صلاحیتوں اور کامیابیوں کو سراہا۔ انہوں نے پاکستان کو یومِ آزادی اور یومِ فتح کی تقریبات کے لیے نیک تمناؤں کا بھی اظہار کیا۔

اس موقع پر کرنل جنرل کریم ولیئیف نے صدر الہام علیوف کی جانب سے پاکستان اور آذربائیجان کے درمیان عسکری تعاون میں نمایاں خدمات کے اعتراف میں فیلڈ مارشل عاصم منیر کو آذربایجان کا اعلیٰ عسکری اعزاز ’پیٹریاٹک وار میڈل‘ پیش کیا۔

آذربائیجان کے وفد نے دہشتگردی کے خلاف پاکستان کی مستقل کوششوں کو سراہا اور دفاع و سلامتی کے شعبے میں تعاون کو مزید فروغ دینے کے عزم کا اعادہ کیا۔ وفد نے پاکستان کی گرمجوش میزبانی اور ہر مشکل وقت میں آذربایجان کے ساتھ کھڑے ہونے پر شکریہ ادا کیا۔

قبل ازیں، جی ایچ کیو پہنچنے پر کرنل جنرل کریم ولیئیف کو پاکستان آرمی کے چاق و چوبند دستے نے گارڈ آف آنر پیش کیا۔ انہوں نے یادگارِ شہدا پر حاضری دی اور پھولوں کی چادر چڑھائی۔

ملاقات کے اختتام پر دونوں جانب سے خطے میں امن و استحکام کے لیے مشترکہ کوششیں جاری رکھنے اور دفاعی تعاون کو مزید وسعت دینے کے عزم کا اظہار کیا گیا۔