وفاقی وزیر داخلہ محسن نقوی کی شہید میجر رضوان طاہر کے گھر آمد، اہلِ خانہ سے تعزیت اور خراجِ عقیدت

وفاقی وزیر داخلہ محسن نقوی نے مستونگ میں حالیہ دہشت گرد حملے میں شہید ہونے والے میجر رضوان طاہر کے گھر کا دورہ کیا اور ان کے اہلِ خانہ سے ملاقات کی۔ اس موقع پر انہوں نے شہید کے والد کرنل ریٹائرڈ محمد طاہر، والدہ اور بھائی میجر عثمان طاہر سے دلی ہمدردی اور تعزیت کا اظہار کیا۔

یہ بھی پڑھیں:محسن نقوی کی افغان وزیر داخلہ سے اہم ملاقات،دہشتگردی کی روک تھام اور سرحدی نظم و ضبط پر اتفاق

محسن نقوی نے شہید کے درجات کی بلندی کے لیے دعا کی اور شہید کے اہل خانہ کے بلند حوصلے کو خراجِ تحسین پیش کرتے ہوئے کہا کہ ’آپ شہید بیٹے کے باہمت اور بلند حوصلہ والدین ہیں، آپ کا یہ حوصلہ اور عزم ہی قوم کی اصل طاقت ہے، آپ کی عظمت کو سلام‘۔

وزیر داخلہ نے کہا کہ میجر رضوان طاہر نے اپنی جان کا نذرانہ دے کر قوم کا سر فخر سے بلند کیا۔ ’انہوں نے بھارتی سرپرستی میں کام کرنے والے دہشت گردوں کا بہادری سے مقابلہ کیا اور جام شہادت نوش کیا۔ وہ قوم کے ہیرو ہیں اور ان کی عظیم قربانی کبھی رائیگاں نہیں جائے گی‘۔

انہوں نے مزید کہا کہ شہداء کے خاندانوں کی لازوال قربانیوں کو پوری قوم ہمیشہ یاد رکھے گی اور ان کے احسانات کی مقروض رہے گی۔

مزید پڑھیں:ایشیائی کرکٹ کونسل کا سالانہ اجلاس، محسن نقوی ڈھاکہ پہنچ گئے، بھارت کا مخاصمانہ روّیہ، شرکت سے انکار

شہید کے والد کرنل ریٹائرڈ محمد طاہر نے بتایا کہ ان کے بیٹے نے متعدد انٹیلیجنس بیسڈ آپریشنز کو لیڈ کیا اور کئی دہشت گردوں کو انجام تک پہنچایا۔

اس موقع پر چیف کمشنر اسلام آباد محمد علی رندھاوا اور آئی جی اسلام آباد پولیس علی ناصر رضوی بھی موجود تھے۔

واضح رہے کہ میجر رضوان طاہر چند روز قبل مستونگ میں بھارتی اسپانسرڈ دہشت گردوں کے آئی ای ڈی دھماکے میں شہید ہو گئے تھے۔