پاکستان اور جزیرہ نما ملک مائکرونیشیا کے درمیان سفارتی تعلقات قائم

پاکستان اور مغربی بحرالکاہل کے جزیرہ نما ملک وفاقی ریاستِ مائکرونیشیا نے باضابطہ طور پر سفارتی تعلقات قائم کر لیے ہیں،نیویارک میں پاکستان کے مستقل مندوب برائے اقوام متحدہ عاصم افتخار احمد اور وفاقی ریاستِ مائکرونیشیا کے مستقل مندوب سفیر جیم ایس لپوے نے مشترکہ اعلامیہ پر دستخط کیےجس کے تحت دونوں ممالک کے تعلقات کو رسمی شکل دی گئی۔

یہ تقریب پاکستان مشن برائے اقوام متحدہ میں منعقد ہوئی جس میں دونوں ممالک کے سفارتکار شریک ہوئے، جن میں پاکستان کے نائب مستقل مندوب سفیر عثمان جدون بھی شامل تھے،اس موقع پر اپنے خیالات کا اظہار کرتے ہوئے سفیر عاصم افتخار احمد نے کہا کہ انہیں یہ اعزاز حاصل ہوا ہے کہ دونوں ممالک کے درمیان سفارتی روابط پاکستان کے یومِ آزادی کی سالگرہ کے موقع پر قائم ہو رہے ہیں۔

ان کا کہنا تھا کہ یہ تعلقات انسانی وسائل کی ترقی، صلاحیت میں اضافہ اور ماحولیاتی تبدیلی جیسے شعبوں میں نئے مواقع پیدا کریں گے،انہوں نے مزید کہا کہ دونوں ممالک کے مشنز اقوام متحدہ میں عالمی امن و سلامتی سمیت اہم امور پر قریبی تعاون جاری رکھیں گے۔

یہ خبر بھی پڑھیں :پاکستان اور امریکا کے درمیان سفارتی تعلقات میں اہم پیش رفت، اسحاق ڈار اور مارکو روبیو کے درمیان ملاقات طے

سفیر نے اس امر پر خوشی کا اظہار کیا کہ پاکستان وہ سو واں ملک ہے جس کے ساتھ مائکرونیشیا نے اپنے سفارتی تعلقات قائم کیے ہیں،دوسری جانب سفیر جیم ایس لپوے نے کہا کہ یہ دونوں ممالک کے تعلقات میں ایک نئے دور کا آغاز ہے۔

انہوں نے اس موقع کو اپنے لیے اعزاز قرار دیا اور کہا کہ وہ پاکستان کے ساتھ دوستی اور شراکت داری کے اس سفر کو آگے بڑھانے کے لیے پرعزم ہیں،انہوں نے اپنے ملک میں اقوام متحدہ کے دفاتر کھولنے کے لیے پاکستان کی حمایت پر شکریہ ادا کیا اور کہا کہ وہ اپنے پاکستانی ہم منصب کے ساتھ تعلقات کو مزید مضبوط بنانے کے خواہشمند ہیں۔

اس موقع پر انہوں نے پاکستان کے یومِ آزادی پر مبارکباد بھی پیش کی،تقریب سے پہلے دونوں سفیروں کے درمیان ایک مختصر ملاقات ہوئی جس میں دو طرفہ تعلقات اور اقوام متحدہ کے پلیٹ فارم پر ممکنہ تعاون سمیت باہمی دلچسپی کے امور پر تبادلہ خیال کیا گیا۔