دنیا بھر میں کشمیری عوام بھارت کے یومِ آزادی کو یومِ سیاہ کے طور پر منا رہے ہیں، مقبوضہ وادی سمیت ہر جگہ احتجاج اور ہڑتال کی کال دی گئی ہے تاکہ دنیا کو بتایا جا سکے کہ کشمیری بھارتی تسلط کو مسترد کرتے ہیں اور آزادی کے متلاشی ہیں۔
کشمیر میڈیا سروس کے مطابق آل پارٹیز حریت کانفرنس نے مقبوضہ جموں و کشمیر کے عوام سے مکمل شٹر ڈاؤن اور ہڑتال کی اپیل کی ہے۔
حریت قیادت کا کہنا ہے کہ یہ دن کشمیریوں کے لیے غلامی، بھارتی جبر اور مظالم کی یاد دلاتا ہے، اس دن کو منانے کا مقصد دنیا کو یہ پیغام دینا ہے کہ کشمیری بھارتی تسلط کو مسترد کرتے ہیں اور آزادی چاہتے ہیں۔
کشمیری عوام کا مؤقف ہے کہ وہ اقوامِ متحدہ کی قراردادوں کے مطابق اپنا حقِ خود ارادیت مانگ رہے ہیں اور عالمی برادری سے مطالبہ کرتے ہیں کہ وہ اس سلسلے میں اپنا کردار ادا کرے۔
حریت قیادت کی اپیل کے بعد بھارتی فورسز نے کریک ڈاؤن کرتے ہوئے گھروں پر چھاپے مارے، درجنوں نوجوانوں کو گرفتار کیا اور انٹرنیٹ سروس بند کر دی۔
اس کے باوجود وادی کے مختلف علاقوں میں کشمیری نوجوانوں نے یومِ سیاہ کے بینرز، سیاہ پرچم اور پاکستانی جھنڈے آویزاں کیے جبکہ آزادی کے حق میں نعرے اور بھارت مخالف وال چاکنگ بھی کی گئی۔
دوسری جانب کشمیری رہنماؤں نے 14 اگست کو پاکستان کا یومِ آزادی یومِ تشکر کے طور پر منایا اور پاکستانی عوام کو مبارکباد پیش کی۔
By 
