جشن معرکہ حق کے موقع پر یادگاری سکہ جاری، تصاویر وائرل

اسٹیٹ بینک آف پاکستان نے جشنِ معرکۂ حق اور یومِ آزادی کے موقع پر 75 روپے مالیت کا یادگاری سکہ جاری کر دیا ہے۔ اس اقدام کا مقصد معرکۂ حق میں مسلح افواج کی بہادری اور قربانیوں کو خراجِ تحسین پیش کرنا ہے۔

یہ سکہ حکومتِ پاکستان کی ہدایت پر جاری کیا گیا ہے، جس کی دھات میں 79 فیصد تانبہ، 20 فیصد زنک اور ایک فیصد نکل شامل ہے۔ اس کا وزن 13.5 گرام اور قطر 30 ملی میٹر ہے۔

سکے کے سامنے کے رخ پر وسط میں بڑھتا ہوا ہلال اور پانچ نوکوں والا ابھرتا ہوا ستارہ کندہ ہے، جو شمال مغرب کی طرف رخ کیے ہوئے ہے۔ ستارے اور ہلال کے اوپر “اسلامی جمہوریہ پاکستان” کے الفاظ درج ہیں، جبکہ چاند کے نیچے گندم کی دو خمیدہ بالیوں کے اوپر اجرا کا سال “2025” لکھا ہے۔ ہلال اور ستارے کے دائیں اور بائیں جانب بالترتیب “75” اور “روپیہ” تحریر ہے۔

یہ بھی پڑھیں: رافیل گرنے کے بعد بھارت سے کچھ بھی سنبھالا نہیں جارہا، یوم آزادی پر جھنڈابھی گرادیا

سکے کے پچھلے رخ پر وسط میں “معرکۂ حق” درج ہے، جبکہ نیچے کی جانب دو لڑاکا طیارے، ایک بحری جہاز اور ملٹی پل راکٹ لانچر سسٹم کی ابھری ہوئی تصاویر موجود ہیں، جو مسلح افواج کی صلاحیت اور قربانیوں کی نمائندگی کرتی ہیں۔ سکے کے بالائی کنارے پر “پاکستان ہمیشہ زندہ باد” کے الفاظ درج ہیں۔

یہ یادگاری سکہ 15 اگست 2025 سے اسٹیٹ بینک بینکنگ سروسز کارپوریشن کے فیلڈ دفاتر کے ایکسچینج کاؤنٹرز پر دستیاب ہوگا۔