سیلابی صورتحال ، پاکستان بھر میں 911 ایمرجنسی ہیلپ لائن فعال

خیبرپختونخوا میں سیلابی صورتحال کے بعد وزارت انفارمیشن ٹیکنالوجی و ٹیلی کمیونی کیشن نے ملک بھر میں 911 ہیلپ لائن فعال کردی۔

تفصیلات کے مطابق وزیراعظم شہباز شریف کی ہدایت پر وزارتِ انفارمیشن ٹیکنالوجی و ٹیلی کمیونیکیشن نے ملک بھر میں 911 ایمرجنسی ہیلپ لائن کو فوری طور پر فعال کر دیا ہے تاکہ بارشوں اور سیلاب سے پیدا ہونے والی ہنگامی صورتحال میں عوام کو فوری اور مؤثر مدد فراہم کی جا سکے۔

 وزارت آئی ٹی نے بتایا کہ 911 سروس اس وقت بھی فعال رہے گی جب کسی علاقے میں صارف کے اپنے موبائل نیٹ ورک کے ٹاورز متاثر یا غیر فعال ہو جائیں تو سروس قریبی علاقے کے کسی بھی کمپنی کےفعال ٹاورسےخودکارطورپرمنسلک ہوگی تاکہ متاثرہ شہری 911 پر رابطہ کر کے ہنگامی مدد حاصل کر سکیں۔

مزید پڑھیں:شدید بارشوں اور لینڈ سلائیڈنگ سے پاکستان میں 250 سے زیادہ افراد جاں بحق، سینکڑوں گھر اور املاک تباہ، سوگ کا اعلان

وزیرِ آئی ٹی شزا فاطمہ خواجہ نے ایکس اکاؤنٹ پر اس حوالے سے آگاہ کرتے کہا کہ ہم نے سیلاب متاثرین کے لیے ایمرجنسی 911 سروس شروع کر دی ہے ، اگر موبائل میں بیلنس نہ بھی ہو، یا آپ کے اپنے نیٹورک کا ٹاور بند ہو، تو کال خود قریبی دوسرے نیٹ ورک کے فعال ٹاور کے ذریعے ہو جائے گی، براہِ کرم غیر ضروری کالزنہ کریں تاکہ ہم متاثرہ افراد کو فوری مدد پہنچا سکیں۔

ہم نے سیلاب متاثرین کے لیے ایمرجنسی 911 سروس شروع کر دی ہے

اگر موبائل میں بیلنس نہ بھی ہو، یا آپ کے اپنے نیٹورک کا ٹاور بند ہو، تو کال خود قریبی دوسرے نیٹ ورک کے فعال ٹاور کے ذریعے ہو جائے گی

براہِ کرم غیر ضروری کالزنہ کریں تاکہ ہم متاثرہ افراد کو فوری مدد پہنچا سکیں #floods pic.twitter.com/QHQT4hebZ4

— Shaza Fatima Khawaja (@ShazaFK) August 16, 2025

ترجمان نے شہریوں سے اپیل کی ہے کہ وہ کسی بھی ہنگامی صورتحال میں فوری رابطے کے لیے 911 ڈائل کریں، تاہم غیر متاثرہ شہری غیرضروری کالزسے گریزکریں تاکہ ضرورت مند افراد کو سہولت ملے۔

خیال رہے کہ خیبرپختونخوا، آزاد کشمیر اور گلگت بلتستان میں طوفانی بارشوں، کلاؤڈ برسٹ اور سیلابی ریلوں نے بڑے پیمانے پر تباہی مچادی ہے۔

اب تک300 سے زائد افراد جان کی بازی ہار چکے ہیں جبکہ بونیر میں سب سے زیادہ ہلاکتیں رپورٹ ہوئیں۔

یہ بھی پڑھیں : ماہ ربیع الاول کا چاند کب نظر آئے گا؟ سپارکو نے پیشگوئی کردی

وزیراعظم نے ہنگامی صورتحال کے پیش نظر خیبرپختونخوا کو ترجیحی بنیادوں پر امدادی سامان ٹرکوں کے ذریعے روانہ کرنے کی ہدایت جاری کر دی ہے۔