پی سی بی کا سینٹرل کنٹریکٹ 26- 2025کا اعلان ، بابر ، رضوان اور شاہین کی تنزلی

 پاکستان کرکٹ بورڈ نے 26-2025 کے لیے کرکٹرز کے سینٹرل کنٹریکٹس کا اعلان کردیا جس کے تحت 30 کھلاڑیوں کو کنٹریکٹس دیے گئے ہیں۔

 ذرائع کا کہنا ہے کہ سینٹرل کنٹریکٹ کی اے کیٹیگری کو ختم نہیں کیا گیا ہے نئے سینٹرل کنٹریکٹ میں کوئی بھی کھلاڑی اے کیٹیگری کے معیار پر پورا نہیں اتر سکا ہے۔

پرفارمنس کی بنیاد پر کیٹیگری بی، سی اور ڈی میں 10،10 کھلاڑی رکھے گئے ہیں،  کنٹریکٹس یکم جولائی 2025 سے 30 جون 2026 تک لاگو ہوں گے۔

گزشتہ سال 27 کھلاڑیوں کو کنٹریکٹ دیے گئے تھے جبکہ اس سال 12 نئے کھلاڑیوں کو بھی فہرست میں شامل کیا گیا ہے۔

مزید پڑھیں:بابر اعظم کا مسئلہ کیا ہے؟ کپتان قومی ٹیم محمد رضوان کا بابر اعظم سے متعلق بڑا انکشاف

اس مرتبہ 9 کھلاڑی اپنی سابقہ کیٹیگری برقرار رکھنے میں کامیاب ہوئے جبکہ 8 کھلاڑی کنٹریکٹ حاصل کرنے میں ناکام رہے۔

بی کیٹیگری میں  بابر اعظم، محمد رضوان، شاہین شاہ آفریدی، فخر زمان، شاداب خان، ابرار احمد، حارث رؤف، حسن علی، صائم ایوب، سلمان علی آغا شامل ہیں۔

سی کیٹیگری میں عبداللہ شفیق، نسیم شاہ، سعود شکیل، فہیم اشرف، ساجد خان، محمد نواز، محمد حارث، صاحبزادہ فرحان، حسن نواز، نعمان علی کو رکھا گیا ہے۔

ڈی کیٹیگری میں  شان مسعود، حسین طلعت، محمد عباس، محمد وسیم جونیئر، محمد عباس آفریدی، خوشدل شاہ، احمد دانیال، سلمان مرزا، خرم شہزاد، سفیان مقیم جگہ بنا سکے ۔

پی سی بی کے ذرائع کا کہنا ہے کہ سینٹرل کنٹریکٹ کی سی اور ڈی کیٹیگری کے معاوضوں میں اضافہ کیا گیا ہے، سی کیٹیگری میں قومی کرکٹرز کو اب 20 لاکھ کے بجائے 25 لاکھ روپے ماہانہ ملیں گے جبکہ ڈی کیٹیگری میں قومی کرکٹرز کو اب 12 لاکھ کے بجائے 15 لاکھ روپے ماہانہ ملیں گے۔

یہ بھی پڑھیں : سہ فریقی سیریز اور ایشیا کپ کے لیے 17 رکنی پاکستانی اسکواڈ کا اعلان، بابراعظم، محمد رضوان ٹیم سے باہر

ذرائع کے مطابق بی کیٹیگری کے کھلاڑیوں کے ماہانہ معاوضے میں کوئی اضافہ نہیں کیا گیا ہے۔

یاد رہے کہ گزشتہ برس اے کیٹیگری میں بابر اعظم اور محمد رضوان شامل تھے۔