پاک فضائیہ کی جانب سے گلگت بلتستان کے سیلاب سے متاثرہ علاقوں میں ریلیف آپریشن بھرپور انداز میں جاری ہے۔
پاک فوج کےمحکمہ تعلقات عامہ ( آئی ایس پی آر) کی جانب سے جاری تفصیلات کے مطابق نور خان ایئر بیس سے سی ون 30 طیارے کے ذریعے 7 ٹن خشک راشن متاثرہ علاقوں میں پہنچایا گیا، جبکہ اشیائے خورونوش، ادویات اور دیگر امدادی سامان بھی روانہ کیا گیا ہے۔
یہ امدادی کارروائیاں نیشنل ڈیزاسٹر مینجمنٹ اتھارٹی (این ڈی ایم اے) کے تعاون سے انجام دی جارہی ہیں اور متاثرہ علاقوں میں امداد کی منصفانہ تقسیم کو یقینی بنایا جا رہا ہے۔
آئی ایس پی آر کے مطابق پاک فضائیہ نے اب تک 75 افراد کو محفوظ مقامات پر منتقل کیا ہے، جبکہ ریلیف آپریشن انتہائی سرعت اور مربوط حکمت عملی کے تحت جاری ہے۔ متاثرین کو راشن، ادویات، شیلٹرز اور فوری طبی امداد کی فراہمی کو یقینی بنایا جا رہا ہے۔
فوج کے ترجمان کا کہنا ہے کہ یہ ریلیف آپریشن قیمتی جانوں کے تحفظ اور قومی خدمت کے جذبے کا منہ بولتا ثبوت ہے۔ یہ مہم ملک گیر ہنگامی امدادی مہم کا حصہ ہے، جس میں آنے والے دنوں میں بھی امدادی سرگرمیاں جاری رکھی جائیں گی۔
آئی ایس پی آر نے کہا کہ ریلیف آپریشن افواجِ پاکستان کے اس عزم کا مظہر ہے کہ وہ ہر مشکل گھڑی میں قوم کے شانہ بشانہ کھڑی ہے۔
By 
