سپر اسٹار امیتابھ بچن کا بنگلہ پانی میں ڈوب گیا، ویڈیو وائرل

بھارت کے شہر ممبئی میں حالیہ موسلا دھار بارشوں نے جہاں روزمرہ زندگی کو بری طرح متاثر کیا ہے، وہیں فلمی دنیا کے بڑے ستارے بھی اس سے محفوظ نہ رہ سکے۔

سپر اسٹار امیتابھ بچن کا مشہور زمانہ جوہو بنگلہ ”پرتیکشا“ بارش کے پانی میں ڈوب گیا اور اس کے اندر تک پانی بھرنے کی ویڈیوز سوشل میڈیا پر تیزی سے وائرل ہو رہی ہیں۔

وائرل ویڈیوز میں دیکھا جا سکتا ہے کہ بنگلے کے باہر اور اندرونی حصے میں گھٹنوں تک پانی جمع ہے۔ ایک شخص ویڈیو میں یہ کہتے ہوئے سنائی دیتا ہے کہ ”پیسہ ہو یا شہرت، ممبئی کی بارش کسی کو نہیں بخشتی، نہ امبانی، نہ امیتابھ بچن!“ یہ ویڈیو اس وقت ریکارڈ کی گئی جب سڑک کا پانی سیدھا بنگلے کے اندر داخل ہو گیا۔ ایک کار کو بھی پانی میں پھنسا ہوا دیکھا جا سکتا ہے۔ جیسے ہی ویڈیو بنانے والا شخص سیکیورٹی کی جانب بڑھتا ہے، اسے وہاں سے نکال دیا جاتا ہے۔

یہ تاریخی بنگلہ ممبئی کے جوہو علاقے میں واقع ہے اور امیتابھ بچن کی زندگی میں نمایاں حیثیت رکھتا ہے۔ ویڈیو میں سڑک سے لے کر بنگلے کے اندر تک ہر طرف پانی ہی پانی دکھائی دیتا ہے اور پورا علاقہ بارش سے زیرِ آب نظر آتا ہے۔ ویڈیو میں ایک شخص یہ دعویٰ بھی کرتا ہے کہ امیتابھ بچن خود وائپر لے کر پانی صاف کرنے میں مدد کے لیے باہر آئے۔ اس نے مزید کہا کہ ”چاہے آپ کے پاس کتنی بھی دولت ہو یا آپ ہزاروں کروڑ کے مالک ہوں، ممبئی کی بارش سے کوئی نہیں بچ سکتا، نہ امبانی، نہ امیتابھ بچن!“

#AmitabhBachchan #MumbaiRains #viralvideo pic.twitter.com/ilP1ddf5bA

— Diksha Sharma (@DikshaS17150327) August 19, 2025

بتایا جاتا ہے کہ یہ بنگلہ فلمساز رمیش سپی نے فلم “شعلے” کی شاندار کامیابی کے بعد امیتابھ بچن اور جیا بچن کو تحفے میں دیا تھا۔ امیتابھ بچن نے یہ گھر 1976 میں خریدا تھا اور آج اس کی مالیت 50 کروڑ روپے سے زائد بتائی جاتی ہے۔ یہ گھر بچن خاندان کے لیے جذباتی اہمیت رکھتا ہے کیونکہ ان کے دونوں بچے شویتا بچن اور ابھیشیک بچن اسی میں پیدا ہوئے تھے۔ اس گھر کا نام ”پرتیکشا“ امیتابھ بچن کے والد اور مشہور شاعر ہری ونش رائے بچن نے رکھا تھا۔ کچھ عرصہ قبل امیتابھ بچن نے یہ بنگلہ اپنی بیٹی شویتا بچن کو تحفے میں دیا تھا اور فی الحال یہ انہی کے زیرِ استعمال ہے۔

یہ بھی پڑھیں: ایشیا کپ 2025: بھارت اور پاکستان میچ سے قبل جعلی ٹکٹوں کی فروخت کا خدشہ

دوسری جانب ممبئی اور گرد و نواح کے علاقوں، جن میں تھانے، رائے گڑھ، رتناگری اور پالگھر شامل ہیں، میں شدید بارش کے باعث ریڈ الرٹ جاری کیا گیا ہے۔ ٹرین سروسز، ہوائی پروازیں اور سڑکوں پر ٹریفک بری طرح متاثر ہے جبکہ محکمہ موسمیات نے بارش کا سلسلہ 21 اگست تک جاری رہنے کی پیش گوئی کی ہے۔