یونان کا ڈیجیٹل ویزا کیسے حاصل کیا جاسکتا ہے؟ اپلائی کرنے کا مکمل طریقہ جانئے

اگر آپ فری لانسر ہیں، آن لائن کاروبار کرتے ہیں یا ریموٹ جاب کرتے ہیں اور یورپ کے کسی خوبصورت ملک میں رہ کر کام کرنے کا خواب رکھتے ہیں تو یونان کا ڈیجیٹل نوماڈ ویزا آپ کے لیے دستیاب ہے۔

یونان نے یہ ویزا 2021 میں متعارف کرایا تھا جو غیر یورپی یونین شہریوں بشمول پاکستانیوں کے لیے کھلا ہے۔ یہ ویزا ایک سال کے لیے جاری ہوتا ہے اور مزید دو سال تک بڑھایا جا سکتا ہے۔

اہلیت اور بنیادی شرائط

پاکستانی شہری اس ویزے کے لیے درخواست دے سکتے ہیں کیونکہ پاکستان یورپی یونین یا یورپی اکنامک ایریا (EEA) کا حصہ نہیں۔ درخواست گزار کی عمر کم از کم 18 سال ہونی چاہیے۔
اہم شرط یہ ہے کہ ملازمت یا کام یونان سے باہر کسی کمپنی یا کلائنٹس کے ساتھ ہو، کیونکہ مقامی سطح پر ملازمت ممنوع ہے۔
آمدنی کی کم از کم شرط 3,500 یورو ماہانہ (تقریباً 10.5 لاکھ روپے) ہے۔ اگر بیوی ساتھ ہے تو 20 فیصد یعنی 700 یورو اور فی بچہ 15 فیصد یعنی 525 یورو اضافی آمدنی ثابت کرنا ہوگی۔ اس کے علاوہ نجی ہیلتھ انشورنس اور صاف جرائم ریکارڈ بھی لازمی ہے۔

یہ بھی پڑھیں: عمرہ ویزا کا حصول آسان، سعودی عرب نے ’نسک عمرہ‘ پلیٹ فارم متعارف کروا دیا

تقاضے اور دستاویزات
درخواست دہندگان کو چند اہم دستاویزات جمع کرانا ہوں گی، جو انگریزی یا یونانی میں ترجمہ شدہ اور اپوسٹل (Hague Apostille) کے ساتھ ہونی چاہئیں۔ ان میں شامل ہیں:
درخواست فارم
درست پاسپورٹ
دو بائیومیٹرک تصاویر
ریموٹ ملازمت کا ثبوت (کنٹریکٹ یا بزنس رجسٹریشن)
گزشتہ 3 سے 6 ماہ کے بینک اسٹیٹمنٹس یا تنخواہ کی پرچیاں
ہیلتھ انشورنس (کم از کم 30,000 یورو کوریج)
پولیس یا نادرا کا کریمنل ریکارڈ سرٹیفکیٹ
رہائش کا ثبوت
ساتھ ہی ایک اعلامیہ دینا ہوگا کہ آپ یونانی کمپنی کے لیے کام نہیں کریں گے۔

درخواست کا طریقہ کار

یونان کا ڈیجیٹل نوماڈ ویزا حاصل کرنے کا عمل نسبتاً آسان ہے اور اس میں 10 سے 30 دن لگتے ہیں۔ پہلے تمام دستاویزات تیار اور ترجمہ کروا کر یونانی سفارتخانے یا وی ایف ایس گلوبل (اسلام آباد) میں اپوائنٹمنٹ لیں۔ وہاں فیس ادا کر کے دستاویزات جمع کرائیں، جو فی فرد 75 یورو (تقریباً 22,500 روپے) ہے۔ فیصلے کے بعد 10 دن سے ایک ماہ میں ویزا (ٹائپ ڈی) جاری کر دیا جاتا ہے۔ یونان پہنچنے پر ایک ماہ کے اندر رہائشی کارڈ کے لیے رجسٹریشن لازمی ہے۔

یہ بھی پڑھیں: ویزا فراڈ اور کاپی رائٹ کی خلاف ورزی میں ملوث تین ملزمان گرفتار

اخراجات
ویزا فیس 75 یورو جبکہ فیملی ممبر کے لیے 150 یورو فی فرد ہے۔ ہیلتھ انشورنس، ترجمہ اور اپوسٹل کے دیگر اخراجات ملا کر کل لاگت تقریباً 60,000 سے 150,000 روپے بنتی ہے۔

فوائد

یونان کا ڈیجیٹل نوماڈ ویزا پاکستانی فری لانسرز، ریموٹ ملازمین اور آن لائن کاروباری افراد کو یورپ میں رہائش، بہتر طرزِ زندگی اور عالمی مارکیٹ تک براہِ راست رسائی کا نادر موقع فراہم کرتا ہے۔
یہ ویزا نہ صرف انفرادی سطح پر مواقع بڑھاتا ہے بلکہ پاکستان کی فری لانس اکانومی کو بھی عالمی سطح پر نمایاں کرنے کا سبب بن سکتا ہے۔