وزیر اطلاعات سندھ شرجیل میمن نے اعلان کیا ہے کہ خواتین کو مفت پنک اسکوٹر حاصل کرنے کے لیے ڈرائیونگ لائسنس لازمی ہوگا۔ انہوں نے کہا کہ اگلے ماہ کے آخر تک یہ اسکوٹرز فراہم کی جائیں گی۔
تفصیلات کے مطابق شرجیل میمن نے نجی ٹی وی کے پروگرام میں گفتگو کرتے ہوئے بتایا کہ سندھ حکومت خواتین کو پاکستان کی پہلی ای وی پنک اسکوٹر فراہم کر رہی ہے۔
ان کے مطابق پہلے مرحلے میں اس منصوبے کے لیے 10 ہزار درخواستیں موصول ہوئی ہیں، جن میں سے تقریباً 150 خواتین کے پاس مکمل ڈرائیونگ لائسنس ہے جبکہ باقی خواتین لرننگ لائسنس کے لیے درخواست دیں گی۔
صوبائی وزیر نے بتایا کہ کے ایم سی سندھ حکومت کے ساتھ مل کر اس منصوبے پر کام کرے گا، خواتین کو بائیک ٹریننگ دی جائے گی اور ڈرائیونگ لائسنس کی فیس بھی حکومت ادا کرے گی۔ اگر ایک ہزار سے زیادہ بائیکیں تیار ہو گئیں تو بیلٹنگ کا عمل بھی ہوگا۔
انہوں نے مزید کہا کہ پنک اسکوٹر کے ساتھ خواتین کو ٹریننگ اور ہیلمٹ بھی فراہم کیے جائیں گے، تاہم صرف وہ خواتین جن کے پاس ڈرائیونگ لائسنس ہوگا، انہیں مفت اسکوٹر دی جائے گی۔
شرجیل میمن نے بتایا کہ کراچی میں ٹرانسپورٹ کے کئی منصوبے جاری ہیں، بی آر ٹی مکمل ہو چکی ہے جبکہ مزید دو منصوبوں پر کام تیزی سے جاری ہے۔ ستمبر میں مزید ای وی بسیں اور ڈبل ڈیکر بسیں بھی شامل کی جائیں گی تاکہ شہریوں کو ٹرانسپورٹ میں مشکلات کا سامنا نہ کرنا پڑے۔
By 
