غیر ملکی سمز کی خرید و فروخت میں ملوث افراد ہوشیار

غیر ملکی سمز کی خریداری اور فروخت میں ملوث افراد ہوشیار ہو جائیں کیونکہ انہیں سخت سزاؤں کا سامنا کرنا پڑ سکتا ہے۔

پاکستان ٹیلی کمیونیکیشن اتھارٹی (پی ٹی اے) شہریوں کی ذاتی معلومات کے تحفظ کے لیے اقدامات کرتی ہے اور اس حوالے سے وقتاً فوقتاً انتباہات جاری کرتی رہتی ہے۔

پی ٹی اے نے حال ہی میں ایسے افراد کو خبردار کیا ہے جو غیر ملکی سمز کی خرید و فروخت میں ملوث ہیں۔ اتھارٹی کے مطابق غیر ملکی سم خریدنا اور بیچنا پاکستان میں غیر قانونی اور قابل سزا عمل ہے، لہٰذا ایسی غیر قانونی سرگرمیوں سے گریز کریں جو قانونی کارروائی اور سخت سزاؤں کا باعث بن سکتی ہیں۔

چند روز قبل پی ٹی اے نے یہ بھی کہا تھا کہ جرائم پیشہ عناصر آپ کی چوری شدہ معلومات استعمال کرتے ہوئے آپ کے نام پر غیر قانونی سم حاصل کر سکتے ہیں، جو فراڈ، غیر قانونی سرگرمیوں اور دہشتگردی میں استعمال ہو سکتی ہیں۔

یہ بھی پڑھیں: کیا موبائل کمپنیوں نے صارفین سے اضافی پیسے وصولی کئے؟ پی ٹی اے نے وضاحت جاری کردی

پی ٹی اے نے صارفین کو اپنے نام پر رجسٹرڈ سمز کی معلومات حاصل کرنے کا آسان طریقہ بھی بتایا ہے۔ رجسٹرڈ سمز کی تعداد معلوم کرنے کے لیے cnic.sims.pk وزٹ کریں۔ اگر انٹرنیٹ دستیاب نہ ہو تو اپنا قومی شناختی کارڈ نمبر 668 پر ایس ایم ایس کریں اور معلومات حاصل کریں۔ اگر آپ کے نام پر کوئی ایسی سم رجسٹرڈ ہے جو آپ استعمال نہیں کر رہے تو اسے فوراً بلاک کروائیں۔

اتھارٹی نے شہریوں کو یہ بھی ہدایت کی ہے کہ نئی موبائل سم ہمیشہ سیلولر کمپنیوں کے مجاز سیلز آؤٹ لیٹس، کسٹمر سروس سینٹرز اور فرنچائز سے خریدیں اور تمام قانونی تقاضے پورے کریں۔