آن لائن کاروبار ( ای کامرس) سے وابستہ افراد کے لئے اہم خبر

فیڈرل بورڈ آف ریونیو (ایف بی آر) نے آن لائن کاروبار کے لیے نئے قواعد و ضوابط جاری کر دیے ہیں اور ڈیجیٹل معیشت کو ٹیکس دائرے میں شامل کرنے کے لیے انکم ٹیکس رولز میں ترامیم کا مسودہ بھی پیش کر دیا ہے۔

ایف بی آر کے مطابق ملکی ڈیجیٹل معیشت کو ٹیکس نیٹ میں لانے کے لیے انکم ٹیکس رولز 2002 میں ترامیم کا مسودہ جاری کیا گیا ہے۔

ایف بی آر کے ایس آر او میں کہا گیا ہے کہ آن لائن کاروبار کرنے والے ہر ادارے کو ماہانہ مالیاتی رپورٹ جمع کرانی ہوگی۔ اس کے لیے ادارے فارم A-1 اور فارم A-2 پر ماہانہ مالیاتی تفصیلات فراہم کریں گے۔

ایس آر او کے مطابق آن لائن کاروبار کی تفصیلات میں این ٹی این، ماہانہ بینک اکاؤنٹ اسٹیٹمنٹس، فروخت کنندہ کا نام، پتہ اور انوائس نمبر شامل کرنا لازمی ہوگا۔

یہ بھی پڑھیں: ایف بی آر نے کاروباری افراد کے لیے سخت قوانین تیار کر لیے  

مزید بتایا گیا ہے کہ ملک بھر کی تمام کوریئر سروس کمپنیوں کو ہر سہ ماہی پر مالی تفصیلات ایف بی آر میں جمع کرانی ہوں گی، جس کے لیے فارم ون جاری کیا گیا ہے۔ آن لائن مالی خدمات فراہم کرنے والی کمپنیوں کو علیحدہ فارم میں سروسز پر ٹیکس کی تفصیلات دینا ہوں گی۔

ایس آر او میں یہ بھی کہا گیا ہے کہ آن لائن کاروبار کرنے والے اداروں کو ٹیکس تفصیلات فراہم کرتے وقت حلفیہ بیان بھی جمع کرانا ہوگا۔

ایف بی آر نے اعلان کیا ہے کہ ان ترامیم کے ڈرافٹ پر اسٹیک ہولڈرز سات دن کے اندر اپنی آرا جمع کرا سکتے ہیں۔