بجلی کے بلوں میں 70 فیصد تک چھوٹ۔۔۔ صارفین کے لیے خوشخبری

وفاقی وزیر توانائی اویس لغاری نے سیلاب سے متاثرہ علاقوں کے عوام کیلئے بجلی بلوں میں ریلیف پیکج کا اعلان کر دیا ہے۔ ان کا کہنا ہے کہ متاثرہ صارفین کو بجلی بلوں میں 70 فیصد تک رعایت ملے گی جبکہ بل جمع کرانے کیلئے اضافی مہلت بھی فراہم کی جا رہی ہے۔

لاہور میں لیسکو ہیڈکوارٹرز میں میڈیا سے گفتگو کرتے ہوئے اویس لغاری نے کہا کہ مشکل حالات میں عوام کو سہولت فراہم کرنا حکومت کی اولین ترجیح ہے۔ انہوں نے واضح کیا کہ اگر مزید ریلیف کا اعلان ہوا تو ڈسٹری بیوشن کمپنیاں (ڈسکوز) اضافی چارجز بھی معاف کریں گی۔

وزیر توانائی نے بتایا کہ سیلابی پانی کی شدت کے باعث کئی علاقوں میں بجلی کی بحالی میں تاخیر ہو رہی ہے، تاہم جیسے ہی صورتحال بہتر ہو گی، سروس مکمل بحال کر دی جائے گی۔ اویس لغاری کا کہنا تھا کہ ملک بھر کے 3 کروڑ 30 لاکھ بجلی صارفین میں سے 1 کروڑ 80 لاکھ افراد پہلے ہی 70 فیصد رعایت سے مستفید ہو رہے ہیں۔

انہوں نے مزید بتایا کہ لیسکو کے ملازمین نے وزیراعظم فلڈ ریلیف فنڈ میں اپنی ایک دن کی تنخواہ عطیہ کی ہے، جبکہ وہ صارفین جو سولر سسٹم استعمال کر رہے ہیں، ان کے بجلی بلوں میں بھی واضح کمی آ رہی ہے۔

اویس لغاری نے اعتراف کیا کہ اگرچہ حکومتی اقدامات سے بجلی کے نرخوں میں کمی آئی ہے، تاہم نئے آئی پی پیز کی نیٹ میٹرنگ کے باعث فی یونٹ قیمت میں 4 روپے کا اضافہ ہوا ہے، جسے کنٹرول کرنے کیلئے اقدامات جاری ہیں۔