ایئر چیف اور بحرین کے چیف آف اسٹاف کی ملاقات، مشترکہ تربیت اور تعاون بڑھانے کا عزم

بحرین کی ڈیفنس فورس کے چیف آف اسٹاف لیفٹیننٹ جنرل تھیاب صقر عبداللہ النعیمی نے اسلام آباد میں ایئر ہیڈکوارٹرز کا دورہ کیا، جہاں ان کی ملاقات پاک فضائیہ کے سربراہ ایئر چیف مارشل ظہیر احمد بابر سدھو سے ہوئی۔

اس موقع پر دونوں رہنماؤں نے باہمی دلچسپی کے امور، دفاعی تعاون کے فروغ اور عسکری شراکت داری کو مزید مستحکم بنانے پر گفتگو کی،ملاقات میں مشترکہ تربیت اور عسکری ترقی کے نئے مواقع تلاش کرنے پر بھی اتفاق کیا گیا۔

لیفٹیننٹ جنرل تھیاب صقر عبداللہ النعیمی کی آمد پر پاک فضائیہ کے دستے نے انہیں گارڈ آف آنر پیش کیا، جبکہ ایئر چیف نے مہمان کا پرتپاک استقبال کیا۔ ایئر چیف مارشل ظہیر احمد بابر سدھو نے کہا کہ پاکستان اور بحرین کے درمیان تاریخی و مذہبی رشتے دونوں ممالک کی افواج کے مضبوط تعلقات کا ثبوت ہیں۔ انہوں نے عسکری تعاون، تکنیکی شراکت اور مشترکہ تربیت کو مزید فروغ دینے پر زور دیا۔

ایہ خبر بھی پڑھیں :چین کی فضائیہ کے چیف آف اسٹاف کی ایئر ہیڈ کوارٹرز اسلام آباد میں ایئر چیف سے ملاقات

بحرین کے چیف آف اسٹاف نے پاک فضائیہ کی پیشہ ورانہ صلاحیتوں اور خود انحصاری کی کوششوں کو سراہتے ہوئے جدید آپریشنز اور تربیتی پروگرامز میں تعاون بڑھانے کی خواہش کا اظہار کیا۔ انہوں نے بحرینی پائلٹس اور انجینئرز کے لیے مشترکہ تربیتی منصوبوں میں بھی دلچسپی دکھائی۔

معزز مہمان نے نیشنل ایرو اسپیس سائنس اینڈ ٹیکنالوجی پارک کے کردار کو سراہا اور بعد ازاں نیشنل آئی ایس آر اینڈ انٹیگریٹڈ ایئر آپریشنز سینٹر کے ساتھ ساتھ پی اے ایف سائبر کمانڈ کا بھی دورہ کیا، جہاں انہیں فضائیہ کی آپریشنل صلاحیتوں کے بارے میں بریفنگ دی گئی۔

یہ ملاقات اس بات کی عکاس ہے کہ پاکستان اور بحرین دفاعی تعلقات اور عسکری شراکت داری کو مزید وسعت دینے کے لیے پرعزم ہیں